Dáýren Abaev: Aýyldar jyldam ári sapaly ınternetti kútip otyr

ASTANA. QazAqparat - QR Aqparat jáne kommýnıkatsııalar mınıstri Dáýren Abaev Úkimet basshysyna aýyldardy ınternetpen qamtamasyz etý jospary týraly baıan etti, dep habarlaıdy «QazAqparat» HAA tilshisi.

«2021 jylǵa deıin mınıstrlik 1249 aýyldy joǵary jyldamdyqty ınternetpen qamtamasyz etýdi josparlaýda. Qamtý aýmaǵynda 2,5 mıllıon halyq turady. Sonymen birge, LTE-800 tehnologııasy boıynsha 800 myń halyq turatyn 2,5 myń aýyldyq eldi meken qamtylady», - dedi mınıstr Úkimet otyrysynda.

Dáýren Abaevtyń aıtýyna qaraǵanda, alystaǵy aýyldardy spýtnık júıesi arqyly ınternetpen qamtý kózdelgen.

«Biz bul jumystyń mańyzdylyǵyn túsinemiz. Jalpy, belgili bir dárejede eldi mekenderdiń barlyǵy ınternetpen qamtylǵan. Álbette, bul jerde ınternettiń sapasy týraly aıtyp otyrmyz. Keıbir qalalarda ınternet qyzmeti tym jedel. Álemdik standarttarǵa saı. Biraq, shalǵaı aýyldarda ınternet óte álsiz», - dep túsindirdi mınıstr.

Mınıstr alys aýyldarda ınternet qyzmetin qosýǵa jeke kompanııalar asa qyzyǵýshylyq tanytpaıtynyn aıtady.

«Sondyqtan, memleket Prezıdenttiń júktegen mindeti boıynsha osy tapsyrmany qolǵa alady. Aýyldar jyldam ári sapaly ınternetti kútip otyrǵanyn túsinemiz. Ásirese, elektrondy kommertsııa arqyly óz ónimin eshqandaı deldalsyz satý úshin ınternetti fermerler kútip otyr. Zamanaýı onlaın-kýrstardan ótý úshin muǵalimder de kútýde. Keńes arqyly operatsııa júrgizý úshin densaýlyq saqtaý salasynyń mamandaryna da ınternet asa qajet. Osy jyldyń ózinde Almaty men Astana qalalaryndaǵy áriptesterimen keńes arqyly qashyqtaǵy aýdan ortalyqtarynda ota júrgizgender bar», - dep túıdi mınıstr.