Dáýren Abaev Almatydaǵy forým aıasynda birneshe áriptesimen kezdesti
Belarýs Respýblıkasynyń baılanys jáne aqparattandyrý mınıstri Sergeı Popkovpen kezdesýde taraptar eki eldegi tsıfrlandyrýdyń negizgi baǵyttary boıynsha salalyq vedomstvolardyń kelesidegi ózara yntymaqtastyǵyn talqylady. Budan tys, mınıstrler elektrondy qyzmetterdi, poshta baılanysyn, ınnovatsııalyq tehnologııalar parkterin damytý máselelerindegi pikirlerin bólisti.
Dáýren Abaev Ózbekstan Respýblıkasy aqparattyq tehnologııalar jáne kommýnıkatsııalardy damytý mınıstri Sherzod Shermatovpen kelissózder kezinde Ortalyq Azııada ekonomıkany tsıfrlandyrý salasyndaǵy eki eldiń róli artyp kele jatqanyn aıtty. D. Abaevtyń sózine qaraǵanda, ınnovatsııalyq ortalyqtardyń, AKT salasyndaǵy uıymdardyń, joǵary oqý oryndarynyń arasyndaǵy baılanystardyń nyǵaıýy transulttyq kompanııalar men ınvestorlardy tartýǵa septigin tıgizedi.
Kezdesý qorytyndylaryna oraı, «Zerde» Ulttyq aqparattyq kommýnıkatsııalyq holdıngi (Qazaqstan) men «UZINFOCOM» memlekettik aqparattyq júıelerdi qurý jáne qoldaý biryńǵaı ıntegratory (Ózbekstan) arasynda túsinistik memorandýmyna qol qoıyldy.
Sondaı-aq, Dáýren Abaev Halyqaralyq elektr baılanysy odaǵynyń bas hatshysynyń orynbasary Malkolm Djonsondy qabyldady. Taraptar Qazaqstandaǵy joǵary oqý oryndarynyń ǵylymı áleýetin arttyrýǵa qatysty yntymaqtastyq jasaý múmkindikterin qarastyrdy
Ázerbaıjan Respýblıkasynyń baılanys jáne joǵary tehnologııalar mınıstriniń orynbasary Elmır Velızademen kezdesýde AKT salasyndaǵy yntymaqtastyq týraly kelisimderge qol jetkizildi.
Aıta keteıik, «Jahandaný dáýirindegi tsıfrlyq kún tártibi» forýmy Memleket basshysy Nursultan Nazarbaevtyń bastamasymen uıymdastyryldy. Sharada ınnovatsııalardy jáne tehnologııalyq kásipkerlikti damytý máseleleri qozǵalyp, basty ıntegratsııalyq jobalar, Eýrazııalyq ekonomıkalyq odaqta ónerkásipti tsıfrlandyrý jáne aýyl sharýashylyǵynyń tsıfrlyq transformatsııalanýy talqylandy.
