Dáýren Abaev Alǵys aıtý kúni týraly: Kópshiliktiń kóńilinen shyqqan merekege aınaldy

ASTANA. QazAqparat - «Habar» arnasyndaǵy «Ashyq dıalog» baǵdarlamasynda qonaqta bolǵan Aqparat jáne qoǵamdyq damý mınıstrliginiń basshysy Dáýren Abaev Alǵys aıtý kúnin halyqtyń kóńilinen shyqqany qýantatynyn atap ótti, dep habarlaıdy QazAqparat tilshisi.

«Alda - Alǵys aıtý kúni kele jatyr. Erteń osy kúndi elimiz atap ótedi. Biz osymen tórtinshi ret osy merekeni atap ótkeli otyrmyz. Osy merekeniń halyqtyń kóńilinen shyqqany qýantady. Ol qazaq jerine, qazaq halqyna degen qurmetti ǵana bildirip qoımaı, bizdiń basty qundylyǵymyz - beıbitshilik jáne birlik, kelisimdi kókke kóteredi. «Jańbyrmen jer kógeredi, alǵyspen el kógeredi» degen sóz bar. Osydan artyq aıtý qıyn», - dedi Dáýren Abaev.

Aıta ketsek, Qazaqstan halqy erteń óz tarıhynda tórtinshi ret Alǵys aıtý kúnin atap ótkeli otyr. 2016 jyldyń 14 qańtarynda Memleket basshysy Nursultan Nazarbaev Jarlyqqa qol qoıyp, oǵan sáıkes, 1 naýryz - elimizde Alǵys aıtý kúni dep jarııalanǵan bolatyn. Aıta keterligi, dál osy 1 naýryz kúni elimizde Qazaqstan halqy Asssambleıasy qurylǵan edi.