Dáýren Abaev AQSh Memhatshysynyń Qazaqstanǵa saparyna qatysty pikir bildirdi

NUR-SULTAN. QazAqparat – QR Aqparat jáne qoǵamdyq damý mınıstri Dáýren Abaev AQSh Memlekettik hatshysy Maık Pompeonyń Qazaqstanǵa sapary týraly pikir bildirdi, dep habarlaıdy QazAqparat tilshisi.

«Bul óte mańyzdy sapar boldy. Onyń Tashkenttegi S5+1 formatyndaǵy Ortalyq Azııa men AQSh elderiniń syrtqy ister mınıstrleriniń kezdesýi aıasynda bolǵanyn umytpaıyq. Meniń oıymsha, Vashıngton kezekti ret ózderiniń syrtqy saıasatynda bizdiń óńirdiń mańyzdy ekenin kórsetti jáne bul qalypty jaǵdaı», - dedi mınıstr «Habar» arnasyndaǵy «Ashyq dıalog» baǵdarlamasynda.

Sonymen birge, D. Abaev geosaıası turǵydaǵy keıbir sarapshylardyń synı pikirlerine jaýap berdi.

«Qazir halyqaralyq qatynastardyń bıpolıarly júıesi sanattarymen paıymdaý durys emes. Qazir «bizben birge bolmaǵandar bizge qarsy» qaǵıdasy jumys istegen qyrǵı-qabaq soǵys joq. Dál sol kúnderi bizdiń elge Reseıdiń jańa premer-mınıstri Mıshýstın keldi. Qazaqstan koronavırýsqa qarsy kúreste Qytaıǵa qoldaý kórsetý jóninde usynys jasady. Munyń bári qatar júrip jatty. Bul – kezinde Nursultan Nazarbaev engizgen jáne búginde Qasym-Jomart Toqaev jalǵastyryp otyrǵan kópvektorly saıasattyń jarqyn kórinisi», - dedi vedomstvo basshysy.

Eske sala ketsek, AQSh-tyń Memlekettik hatshysy Maık Pompeo 1 aqpan kúni Qazaqstan astanasyna keldi.

Sapar aıasynda M. Pompeo QR Tuńǵysh Prezıdenti – Elbasy Nursultan Nazarbaevpen, Qazaqstan Prezıdenti Qasym-Jomart Toqaevpen kezdesti jáne QR Syrtqy ister mınıstri Muhtar Tileýberdimen kelissózder júrgizdi.