Dáýren Abaev Aqparat jáne kommýnıkatsııalar mınıstrligi qyzmetkerlerin Konstıtýtsııa kúnimen quttyqtady

ASTANA. QazAqparat - Qazaqstan Respýblıkasy Aqparat jáne kommýnıkatsııalar mınıstrliginde Konstıtýtsııa Kúni qarsańynda saltanatty jıyn ótti, dep habarlaıdy mınıstrliktiń baspasóz qyzmeti.

Jıyn barysynda mınıstr Dáýren Abaev vedomstva qyzmetkerlerin elimizdiń negizgi zańynyń qabyldanǵanyna 21 jyl tolýymen quttyqtady.

«Elimizdiń táýelsiz damýy jyldarynda Ata Zańymyz óziniń tıimdiligin, demokratııalyǵyn jáne azamattardyń quqyǵy men bostandyǵyn qorǵaýǵa baǵyttalǵanyn dáleldedi. Árıne, osynyń barlyǵy Qazaqstan halqynyń birligi men yntymaǵynyń jáne Memleket basshysy saıasatynyń arqasynda júzege asqany sózsiz», - dedi ol.

Sondaı-aq, D.Abaev mınıstrliktiń barsha qyzmetkerleri óz salasynda otandyq quqyqtyq alańdy jetildirý men damytýǵa eleýli úles qosqanyn atap ótti. Onyń aıtýynsha, osynyń arqasynda Qazaqstanda baılanys pen aqparattandyrý jáne mass-medıa salasynda mańyzdy reformalar júzege asýda.

Sonymen qatar, jıyn barysynda mınıstrlikke qyzmetke qabyldanǵan memlekettik qyzmetkerlerdiń ant berý rásimi ótti.