Daýn sındromyna shaldyqqan balalardyń ata-analaryna kómek kórsetiledi

ASTANA. QazAqparat - 3 shildeden bastap «Kún álemi» qoǵamdyq qorynyń erte kómek berý kabınetiniń janynan Daýn sındromyna shaldyqqan balalardy tárıbelep otyrǵan otbasylarǵa qoldaý kórsetetin jedel jeli iske qosylady, dep habarlaıdy «QazAqparat» HAA tilshisi.

Alǵashqy eki aıda jedel jeli synamaly joba retinde saǵat 10.00-den 19.00-ge deıin jumys isteıdi. Jedel jeli operatory  - kásibı psıholog jáne Daýn sındromyna shaldyqqan balanyń anasy Ásııa.

«Eger sizdiń otbasyńyzda Daýn sındromyna shaldyqqan bala dúnıege kelip onyń kútimi boıynsha kómek jáne keńes kerek bolsa nemese balańyzdyń emdelýi, damýy jáne áleýmettendirý jónindegi suraqtar tolǵandyrsa, Qazaqstannyń kez kelgen qalasynan [phone] nomerine qońyraý shalyńyz. Pılottyq rejımde bul qyzmet tegin, alaıda sizdiń baılanys provaıderińizdiń tarıfine baılanysty abonenttik tólem alynady. Aldaǵy ýaqytta áleýetti demeýshiler men bul máselege beı-jaı qaramaıtyn azamattardyń qoldaýymen jedel jeli qyzmeti tolyqtaı tegin júrgiziledi dep úmittenemiz», - deıdi qor qyzmetkerleri.

№1 perınataldyq ortalyq bazasyndaǵy erte kómek kórsetý kabıneti óz jumysyn bıylǵy jyldyń 15 shildesinen bastaıdy.