Daýly pýnktterdi alyp tastadyq - Abaev tilshilerdi akkredıtteý jaıly
ASTANA. QazAqparat - Aqparat jáne qoǵamdyq damý mınıstri Dáýren Abaev baspasóz qyzmetkerlerin akkredıtteý erejelerine engiziletin ózgerister jobasynan daýly pýnkter alynyp tastalǵanyn, bul máselege qatysty jańa joba tanystyrylatynyn málim etti, dep habarlaıdy QazAqparat tilshisi.
«Baspasóz qyzmetkerlerin akkredıtteý erejelerine engiziletin ózgerister týraly taǵy da aıta ketkim keledi. Tilshiler qaýymy arasynda bul suraq birshama pikirtalas týyndatqan edi. Bul jaǵdaıda biz eshkimnen jaltarǵan joqpyz, jýrnalıstik tsehpen arada qabyrǵa salyp qoıǵan joqpyz. Kerisinshe, usynylǵan ózgertýlerdi jetildirý úshin biz konstrýktıvti dıalog izdeımiz. Belsendilermen kezdesý uıymdastyrylyp, bári de ashyq sıpatta ótti. Talqylaýlar men pikirtalastar, usynystar aıtyldy», - dedi Dáýren Abaev «Habar» arnasyndaǵy «Ashyq dıalog» baǵdarlamasynda.
Mınıstr atalǵan sharalardyń hattamalaryn qarastyra otyryp, kelesi sheshim qabyldanǵaly otyrǵanyn atap ótti.
«Birinshiden, ózgertýler jobasynan akkredıtteýshi uıymdardyń ishki tártibin saqtaý týraly jýrnalıstiń qaǵaz júzindegi kelisimi men moderator belgileıtin reglamentti alyp tastaýdy sheshtik. Tıisinshe, atalǵan shartty oryndamaǵan jýrnalısti akkredıtatsııadan aıyrý týraly pýnkt de alynyp tastaldy. Ekinshiden, jýrnalıst pen BAQ arasyndaǵy kelisimshartty rastaıtyn qujattyń kóshirmesin tapsyrý týraly pýnkt te alynyp qaldy. Shynyn aıtqanda, bul - ózgertýler jobasyndaǵy daýly taqyryptar bolatyn. Biz olardy alyp tastap otyrmyz», - deıdi mınıstr.
Dáýren Abaev dese de talqylaý barysy akkredıtteý máselesin áli de qarastyrý kerektigin kórsetip bergenin jetkizdi.
«Biz sala ókilderinen kóptegen usynystar aldyq. Eń aldymen, jýrnalıstiń quqyǵy men akkredıtteýshi taraptyń mindettemesi týraly máseleler qyzý talqylanýda. Jýyq arada barlyq eskertýlerdi eskeretin ózgertýlerdiń jańa jobasy tanystyrylatyn bolady. Qujat «Ashyq Úkimet» portalynda jarııalanyp, qoǵamnyń talqysyna usynylady» - dedi Dáýren Abaev.
