Dáýletkereı Kápuly: Jasaı bersin, jaınaı bersin Qazaqstan ǵasyry
Qaıyń saýǵan qazaq edim, Altaı - atamekenim,
Taǵdyr maǵan usynbaǵan baly menen shekerin.
Iranda da ılanbadym, basqa túsken taǵdyrǵa,
Júregimdi baýramady bóten áýen, bóten ún.
Parıj benen Germanııa, Ombyda da qazaqpyn,
Shartaraptan tapqan edim jumyr bastyń jetegin.
Aıaǵymdy ańdyp bastym qııa-quzda, muzdaqta,
Tik basatyn saqtyǵyndaı shyńdaǵy taýtekeniń.
Núkistegi Tólegenniń saǵynyshy em sarǵaıǵan,
Qaıda júrsem qazaqtyǵym - júrektegi qan maıdan.
Kókmoınaqpen Túrikpenniń túgel sharlap dalasyn,
Besqala men Qojaelindeı qol bulǵadym shalǵaıdan.
Qyrǵyz benen Qyrym astym, ádiletsiz ýaqytta,
Saryarqanyń bal qymyzy tamsandyryp tańdaıdan.
Ólekshindeı ómir keshý - namysyma qııanat,
Al, taǵdyrym sıpamaǵan taıqy týǵan mańdaıdan!
Aqyt qajy, Ospan edim, Altaıdaǵy aq boran,
Qarsy kelgen ajalǵa da qas-kirpigin qaqpaǵan.
Gımalaıda kıiz tósep túıetaıly asýǵa,
Taklamakan shólinde de janǵa daýa tappaǵan.
Káshmirge de jetken kóshpin Elishannyń jolymen,
Dúnıeniń buryshynda dám bar ma men tatpaǵan?!
Atajurttan kindik úzip, urpaǵymnyń qamy úshin,
Taǵdyr keshtim, kishigirim - shubyryndy aqtaban!
Qazaq úshin qaıda júrsem qaıtalaýmen duǵamdy,
Halıfa Altaı bop oraldym qazaqshalap Qurandy.
Óztúriktiń Mustafasy em, jatqa namys bermegen,
Kúnderde de adaspadym naızaǵaıly, tumandy.
Án bop estim Maıra salǵan júrekterdi tebirentip,
Atam keshken ǵumyrdy oılap, janym jasqa shylandy.
Beıbarystaı jýsan ańsap, jyraqta ósken qozyńmyn,
Ańsaǵanym - Qypshaq dalam, qut tuǵyrym - Turan-dy!
Men baıyrǵy qazaq edim Baı-Ólkede baptalǵan,
Úmitimdi úzbegenmin araılanǵan aq tańnan.
«Jalamanyń jalasynan» áýpirimdep jan qalyp,
Tiri soıǵan tulybym da Kýnskamerada saqtalǵan.
Bostandyqtyń rýhyna besigimde talpynyp,
Qasqyrdaıyn sıraǵymdy shaınap úzip qaqpannan.
Elge ákelgen Qarjaýbaımyn Kúlteginniń kóktasyn,
Tańdaıymda baldaı erip, Ultqa degen tátti arman!
Qudaımenen aramyzǵa aq tilekti elshi etip,
Eshkimge de bas ımegen ór qazaqpyn, eńse tik,
Kókserkesi sekildenip tý-talaqaı kókpardyń,
Jalǵandaǵy ǵumyrymdy qaısarlyqpen ólshetip.
Qazaqstan - júregime boıtumardaı jazylǵan,
Tarydaıyn shashylýdy ómirime enshi etip.
Atameken, saǵan jetip kóz jasymdy qurǵattym,
Kók Táńiri kózimizge kókbaıraqty kórsetip!
Altynordam kúnnen kúnge qulpynaıdaı qulpyra,
Tarlanbozym taqymymda, tizginimdi qymqyra.
Bar qazaqqa qutty bolsyn, saýyn aıtqan quryltaı,
Kókbaıraqtyń qyran ushqan bıigine umtyla.
Táńirime táýba aıtýmen duǵa qyldym, bas ıip,
Atajurtqa jetpeı qalǵan bozdaqtardyń rýhyna.
«Elim-aıdyń» zaryn endi qulaǵyma estirtpe,
Elbasymen bolashaqqa qadam basqan jurtyma!
Ýaı, Nuraǵa, qazaq úshin adamzattyń asyly,
Astanasy - Altynorda, ıranbaqtyń jasyly.
Kúnge qulash sermep týǵan Kúlteginniń qylyshy,
Sary altynnan saýyt kıgen Saq pen Ǵunnyń has uly.
Álemdegi bar qandastyń yqylasyn qabyl al,
Atajurtta basyn qosqan aq júrektiń shashýy.
Qaıta órlegen qazaǵyma kók Táńiri qýat ber,
Jasaı bersin, jaınaı bersin Qazaqstan ǵasyry!
