Dáýlet Turlyhanovtyń júldesine arnalǵan týrnır ótti
ASTANA. QazAqparat - Almatydaǵy Balýan Sholaq atyndaǵy sport saraıynda grek-rım kúresinen 2001-2003 jylǵy jasóspirimder arasynda Dáýlet Turlyhanovtyń júldesine arnalǵan dástúrli XIX respýblıkalyq týrnırdiń jeńimpazdary anyqtaldy, dep habarlaıdy QazAqparat qalanyń aqparattyq jáne sporttyq HAB-yna silteme jasap.
Eske sala ketsek, jarys qatysýshylary úsh kún boıy ózara myqtyny anyqtady. Sońǵy aqtyq kezdesýler qyzyqty da tartysty ótti. Fınalıster bar kúshin saldy. Olar keremet ádister men jekpe-jekterdi kórsetip, grek-rım kúresiniń jankúıerlerine keremet kesh syılady. Qazaqstannyń túkpir-túkpirinen kelgen 259 qatysýshynyń ishinde úzdik ataný ońaı is emes. 48 keli salmaqtaǵy chempıon Dáýlet Áshirxanov óz qarsylasyn Maqsat Ermanovty tize búktirip, bul tapsyrmany keremet oryndap shyqty. Osy salmaq sanatynda sáıkesinshe qola júldesin Jasulan Sharmaqov qanaǵat tutty.
«Jekpe-jek qıyn boldy, qarsylasym da óte myqty. Jalpy bul týrnırde tek úzdik balýandar jınalǵan. Aqtyq báseke bolǵandyqtan bar kúshimizdi salyp, kúrestik. Ekeýimizdi bir bapker jattyqtyrady, ádisterimizdi jaqsy bilemiz, sondyqtan, ońaı bolǵan joq. Daıyndyq ta jaqsy ótken bolatyn. Bapkerlerimniń keńesimen jeńdim dep oılaımyn. Olardyń úmitterin aqtaǵanym úshin sheksiz qýanyshtymyn», - deıdi týrnır jeńimpazy Dáýlet Áshirxanov.
Jarystyń basty maqsaty - jastardy salaýatty ómir saltyn ustanýǵa shaqyrý, osy sport túrin damytý, grek-rım kúresinen Qazaqstan ulttyq quramasyn irikteý.
Týrnır aıaqtalysymen, Qazaqstanǵa eńbegi sińgen bapker, sport qaıratkeri Dáýlet Turlyhanov, Almaty qalasy dene shynyqtyrý jáne sport basqarmasy basshysynyń orynbasary Rústem Baıseıitov jáne grek-rım kúresinen respýblıkalyq bapker Meıirhan Rahmetovtyń qatysýymen baspasóz máslıhaty ótti.
«Biz túrli aýdandardan kelgen sportshylar men bapkerlerge osy týrnırge qatysqany úshin alǵysymyzdy bildiremiz. Osynda balalardy alyp kelip, olardy jattyqtyratyn bapkerlerdiń orny bólek. Barlyǵymyz bir baǵytta jumys jasap jatqanymyz qýantarlyq jaıt. Bizdiń basty maqsatymyz - bolashaq chempıondardy tárbıeleý. Al búgingi jeńimpazdar el namysyn halyqaralyq arenalarda joǵary deńgeıde qorǵaýy qajet», - dep atap ótti Dáýlet Turlyxanov.
Aıta keter jaıt, balýandar UWW erejesine sáıkes 10 salmaq dárejesi boıynsha kúsh synasty. Olar: 45, 48, 51, 55, 60, 65, 71, 80, 92 jáne 110 keli salmaq dárejesin.
Baıraqty básekeniń nátıjeleri boıynsha jalpykomandalyq esepte birinshi oryndy Qajymuqan Muńaıtpasov atyndaǵy respýblıkalyq mektep-ınternat tárbıelenýshileri ıelendi. Olar eki altyn jáne bir kúmis júldelerin oljalady. Al ekinshi oryndy Ońtústik Qazaqstan oblysynyń balýandary jeńse, úzdik úshtikti Soltústik Qazaqstan oblysynyń sportshylary qorytyndylady.
