Dáýlet Turlyhanovtyń uly áskerı mindetin óteýdi jalǵastyra ma

ASTANA. QazAqparat – Almatyda erli-zaıyptyny urdy dep, basy daýǵa ilikken Dáýlet Turlyhanovtyń uly áskerı mindetin óteýdi jalǵastyrýy múmkin be? Bul saýalǵa Qorǵanys vıtse-mınıstri Sultan Qamaletdınov jaýap berdi, dep habarlaıdy QazAqparat tilshisi.

«Ol boıynsha tekserý júrgizildi. Eskeretin jaıt, sarbaz quqyq buzýshylyq jasaǵan kezde demalysta boldy. Qazir tergeý júrip jatyr, sot ótti. Meniń túsinýimshe, aıyptalýshy apellıatsııalyq shaǵym túsirdi. Eger ol kináli dep tanylsa, árıne qarýly kúshterde sottalǵandar qyzmet ete almaıdy», - dep qysqa qaıyrdy Sultan Qamaletdınov Májilis qabyrǵasynda BAQ ókilderiniń saýalyna jaýap bere turyp.

Eske sala keteıik, bıyl aqpanda Almatyda zańger Anna Dmıtrıevıch pen onyń kúıeýi Oleg Chernov soqqyǵa jyǵylǵan edi. Almaty qalalyq Polıtsııa departamenti atalǵan derek QR QK-niń 293-baby («Buzaqylyq») boıynsha sotqa deıingi tergeýdiń biryńǵaı tizilimine tirkelgenin habarlady.

Keıin sport qaıratkeri Dáýlet Turlyhanov balasynyń buzaqylyq áreketine baılanysty pikir bildirdi.

«Aqpannyń 11-ine qaraǵan túni Almatyda meniń ulym men zańgerlerdiń arasynda bolǵan oqıǵaǵa qatysty pikir bildirýdi jón dep taptym. Meniń ulym Nurasyl kámelet jasyna tolǵan azamat, eger onyń kinási dáleldense, oǵan Qazaqstan Respýblıkasynyń zańdaryna sáıkes tıisti shara qoldanylady. Sonymen birge, men ulymnyń áreketi úshin keshirim suraımyn», - dep jazǵan bolatyn Dáýlet Turlyhanov.

Odan bólek, Dáýlet Turlyhanov ulynyń isine aralasyp jatpaǵandyǵyn aıtty.