Dáýlet Turlyhanovtyń áskerı bólimnen qashqan uly jazalana ma

ASTANA. QazAqparat – Qorǵanys mınıstri Rýslan Jaqsylyqov depýtat Dáýlet Turlyhanovtyń áskerı bólimnen qashyp ketken ulyna qatysty túsinik berdi, dep habarlaıdy QazAqparat tilshisi.

«Ol (Nurasyl Bolat - red.) áskerı bólimniń baqylaýynda bolǵan. Biraq óz erkimen ketip qalǵan. Atap aıtqanda, ásker – jasóspirim qylmyskerlerdi ustaıtyn kolonııa emes. Atalǵan máselege qatysty tárbıeden bolǵan kemshilik dep sanaımyn», – dedi Rýslan Jaqsylyqov Úkimet otyrysynan keıin tilshiler suraǵyna jaýap bere otyryp.

Bul turǵyda ol otbasynda jastardyń tárbıesindegi kemshilikterdi ásker qatarynda birden eńserý múmkin emes ekenin aıtty.

«Onyń áskerı bólimnen ketip qalýyna jol bergen ofıtserler tártiptik jazaǵa tartylady. Al áskerı qyzmetshige qatysty jazany sot anyqtaıdy. Gaýptvahtaǵa qamalýy múmkin», – dedi mınıstr.

Budan buryn habarlanǵandaı, depýtat, sport ardageri Dáýlet Turlyhanovtyń uly Qonaev garnızonynyń áskerı bólimderiniń birinen qashyp ketken bolatyn. Keıin ol tabylyp, qyzmet atqaratyn ornyna jetkizildi.

Nurasyl Bolat Almaty qalasynda zańger Anna Dmıtrıevıch pen onyń kúıeýi Oleg Chernovty soqqyǵa jyqty dep kúdikke ilindi.

Almaty qalalyq Polıtsııa departamenti atalǵan derekti QR Qylmystyq kodeksiniń 293-baby («Buzaqylyq») boıynsha sotqa deıingi tergeýdiń biryńǵaı tizilimine tirkedi.

Keıin sport qaıratkeri Dáýlet Turlyhanov balasynyń buzaqylyq áreketine baılanysty túsinik berdi.