Dáýlet Turlyhanov ulynyń isine qatysty: Men aralasyp jatqan joqpyn
«Búginde tergeý amaldary júrip jatyr. Taǵy eske salam, ulym kámelet jasyna tolǵan azamat. Men Chernovtar otbasynan keshirim suradym, qajet jaǵdaıda emdeýge kómek kórsetýge daıyn ekendigimdi aıttym. Biraq, olardan habar bolmady. Aldaǵy 10 kún nemese 2 apta kóleminde tergeý nátıjesimen tanys bolasyzdar. Bul protseske men aralasyp jatqan joqpyn», - dedi Dáýlet Turlyhanov Májilistiń kýlýarynda BAQ ókilderiniń saýalyna jaýap bere turyp.
«Chernovtar tatýlasqysy keledi degen aqparat bar. Qazir mańyzdysy tergeý organdarynyń baǵasy berilsin, odan ári kóre jatarmyz», - deıdi ol.
Odan bólek, tilshiler qaýymy Dáýlet Turlyhanovtan depýtat retinde Májilis qabyrǵasynda qandaı máseleni kóteretini týraly surap kórdi.
«Men halyq ıgiligine jumys isteýge keldim. Bir aı boıy turǵyndarmen, eńbek ujymdarymen kezdestim. Shtabtaǵy ókilderim turǵyndardyń ótinish, aryzyn jınady. Sonyń negizinde máseleler tizbegin jasadyq. Onyń deni mekteptiń jetispeýi, aýrýhana jáne kópbalaly analarǵa qatysty», - deıdi ol.
Eske salsaq, Almatyda zańger Anna Dmıtrıevıch pen onyń kúıeýi Oleg Chernov soqqyǵa jyǵylǵan edi. Almaty qalalyq Polıtsııa departamenti atalǵan derek QR QK-niń 293-baby «Buzaqylyq» boıynsha sotqa deıingi tergeýdiń biryńǵaı tizilimine tirkelgenin habarlady.
Keıin sport qaıratkeri Dáýlet Turlyhanov balasynyń buzaqylyq áreketine baılanysty pikir bildirdi.
«Aqpannyń 11-ine qaraǵan túni Almatyda meniń ulym men zańgerlerdiń arasynda bolǵan oqıǵaǵa qatysty pikir bildirýdi jón dep taptym. Meniń ulym Nurasyl kámelet jasyna tolǵan azamat, eger onyń kinási dáleldense, oǵan Qazaqstan Respýblıkasynyń zańdaryna sáıkes tıisti shara qoldanylady. Sonymen birge, men ulymnyń áreketi úshin keshirim suraımyn», - dep jazǵan bolatyn Dáýlet Turlyhanov.
