Dáýlet Turlyhanov ulyna qatysty jaǵdaı týraly: Osy jerden doǵarǵanymyz durys
ASTANA. QazAqparat – Ulymmen bolǵan bir ǵana jaǵdaı – halyq aldyndaǵy abyroıymdy túsire almaıdy. Depýtat, sport ardageri Dáýlet Turlyhanov áskerı bólimnen qashyp ketken jáne qylmystyq is boıynsha kúdikti retinde tanylǵan uly Nurasyl Bolattyń áreketterine qatysty Facebook-paraqshasynda osylaı jazdy, dep habarlaıdy QazAqparat.
«Sońǵy kezde meniń ulyma qatysty aqparat keńistiginde tarap jatqan habarlarǵa baılanysty ózderińizge úndeýimdi jarııalap otyrmyn.
Sońǵy bes aıda áleýmettik jelilerde ulyma qatysty jaǵdaı boıynsha óte kóp aqparat shyǵyp jatyr. Iıa, bul jaǵdaıdyń bolǵany ras, alaıda ony qoǵamdyq ortaǵa qaıta-qaıta sala berýdiń jóni joq dep esepteımin. Jaǵdaı oryn alǵanda, men óz pikirimdi ashyq aıtqanmyn. Barlyq jaǵdaı zań júzinde sheshilýi kerek degenmin.
Qazirgi kezde qoǵamdyq ortada meniń ulymnyń bir qateliginen basqa, qanshama aıtylatyn ózekti máseleler bar emes pe!? Osy oraıda, ulyma baılanysty jaǵdaıdyń qoǵamda úlken aqparatqa aınalǵany túsiniksiz. Jaraıdy, aqparattar shyǵyp jatyr, osy arqyly haıp jınap, qoǵamda reıtıngin ósiremin degender óz maqsatyna jetken shyǵar. Endi meniń oıymsha bul máseleni osy jerden doǵarǵanymyz durys», - dep jazdy D.Turlyhanov.
Depýtat áleýmettik jelidegi aqparattar onyń ulyna úlken psıhologııalyq aýyrtpalyq túsirip júrgenin sezinetinin aıtty.
«Ol áli jap-jas jigit. Onyń jasaǵany dızertırlik emes, bylaısha aıtqanda, balalyqqa salynyp «samovolkaǵa» shyǵyp ketkeni. Men ulymnyń Qazaqstan Qarýly kúshteriniń sapynda jaýynger bolyp júrgenin maqtan etemin. Ol jastyqtyń jalynymen qatelik jasaǵany túsinikti. Ǵashyq bolyp júrgen bala, súıgen qyzy kelgen eken, soǵan shyǵyp ketken. Bul endi jastyq sezim, mahabbat sezimi. Árıne, men ony aqtamaımyn. Qaı ata-ana óziniń balasyn jaman bolsyn deıdi!?
Osy jaǵdaıǵa baılanysty aqparattardan habardar bolyp otyrǵan balamnyń qazirgi psıhologııalyq jaǵdaıy meni qatty alańdatady. Qudaı saqtasyn, osy jaǵdaı balamnyń taǵdyryn tálkekke salyp, qandaı da bir oqys áreketke barýyna sebep bolsa, men de óz tarapymnan qarap qalmaımyn, qoldanystaǵy zań sheńberinde áreket etemin.
Men ómirimniń basym bóligin úlken sportqa arnaǵan adammyn. On jyl SSSR quramasynda kúrestim, Táýelsiz Qazaqstannyń Týyn tuńǵysh ret Olımpıada oıyndarynda kóterip shyqtym. Ózim sportty qoıǵannan keıin, bapker retinde Azııa, Azııa oıyndary, Álem jáne Olımpıada chempıondaryn tárbıelep shyǵardym. Men qazaqtyń uly bolǵanyma maqtanamyn! Qazaq úshin tógilgen qara terim men ólsheýsiz eńbegimdi halqym baǵalaǵan, áli de baǵalap, qurmettep keledi.
Búgingi kúndegi abyroıym - orasan eńbektiń arqasynda kelgen. Al meniń ulymmen bolǵan bir ǵana jaǵdaı – halyq aldyndaǵy abyroıymdy túsire almaıdy. Qoǵamdy dúrliktirip, aqparat taratyp júrgender osyny túsinse eken deımin.
Qurmetti dostar! Taǵy da qaıtalap aıtqym keledi, ulyma qatysty tergeý amaldary júrgizilip jatyr. Bári zań sheńberinde sheshiletin bolady. Túsinistikpen qaraýdy suraımyn», - dep túıindedi sport ardageri.
Eske salaıyq, 2 shilde kúni Dáýlet Turlyhanovtyń Qonaev garnızonynyń áskerı bólimderiniń birinde merzimdi áskerı boryshyn ótep júrgen uly Nurasyl Bolat áskerı nysannan qashyp ketken bolatyn. Keıin ol tabylyp, qyzmet atqaratyn ornyna jetkizildi.
Nurasyl Bolat Almaty qalasynda zańger Anna Dmıtrıevıch pen onyń kúıeýi Oleg Chernovty soqqyǵa jyqty dep aıyptalýda.
Almaty qalalyq Polıtsııa departamenti atalǵan derekti QR Qylmystyq kodeksiniń 293-baby («Buzaqylyq») boıynsha sotqa deıingi tergeýdiń biryńǵaı tizilimine tirkedi.
Keıin sport qaıratkeri Dáýlet Turlyhanov balasynyń buzaqylyq áreketine baılanysty túsinik bergen edi.
