Dáýlet Turlyhanov ulyna qatysty keleńsizdik jaıly: Bul otbasyma jasalǵan kezekti aqparattyq shabýyl
ASTANA. QazAqparat – Májilis depýtaty Dáýlet Turlyhanov ulynyń qyz balany soqqyǵa jyqqany beınelengen vıdeoǵa qatysty pikir bildirdi, dep habarlaıdy QazAqparat tilshisi.
«Búgingi áleýmettik jelilerde meniń ulyma qatysty taraǵan vıdeo boıynsha túsinik berýdi jón kórdim. Ózderińiz biletindeı, meniń áýletim aınalasyndaǵy mundaı oqıǵalar birinshi ret emes. Osyndaı oqıǵalardyń zańdylyqpen qaıtalanýy meniń kóńilime eriksiz oı salady. Men óz tarapymnan balalaryma tolyqtaı ákelik, qazaqy tárbıe berdim. Búgingi vıdeoǵa qatysty meniń de qoıatyn bir suraǵym bar. Tańǵy saǵat 4-te mundaı qyzdar ulym turatyn úıge kelip, nege ondaı oqıǵaǵa bastaý bolatyny túsiniksiz. Jáne bul jaǵdaı aıaq astynan kameralarǵa túsip qalyp, belgili bir adamdarǵa paıdaly qıyndylarynyń aqparat quraldaryna taraýy, meniń ǵana emes, kez kelgen adamnyń kóńiline kúmán keltiredi», - dep jazdy Dáýlet Turlyhanov Facebook paraqshasynda.
Sonymen qatar ol bul jaıttar óziniń otbasyna jasalǵan aqparattyq shabýyl dep esepteıtindigin ashyq aıtady.
«Bul meniń otbasyma sońǵy jyldary jasalǵan kezekti aqparattyq shabýyl dep oılaımyn. Vıdeony ańǵarǵan adamǵa meniń balamnyń bul janjaldan barynsha qashqaqtaýǵa áreket jasaǵany anyq kórinedi. Sizderge túsinikti bolý úshin vıdeonyń tolyq nusqasyn joldap otyrmyn. Osy bolǵan jaǵdaıdy durys túsinýlerińizdi suraımyn», - dedi Májilis depýtaty.
Búgin Májilistiń jalpy otyrsynan keıin BAQ ókilderiniń saýalyna oraı Dáýlet Turlyhanov ortanshy ulyna qatysty keleńsiz oqıǵany bilmeıtindigin aıtqan edi.
