Dáýlet Turlyhanov pen Kamandar Madjıdov jas palýandarǵa sheberliktiń úlgisin kórsetti
ALMATY. QazAqparat - Almatyda tanymal palýan Dáýlet Turlyhanov pen KSRO-niń Eńbek sińirgen sport sheberi, Olımpıada chempıony Kamandar Madjıdov «Halyq arena» sport kesheninde jattyǵatyn jas palýandarǵa sheberlik synybyn ótkizdi, dep habarlaıdy QazAqparat tilshisi.
Aıta keteıik, bul sheberlik synyby erteń 1 sáýir kúni bastalatyn 2000-2002 jyly týylǵan jasóspirimder arasynda grek-rım kúresinen qoǵam qaıratkeri Dáýlet Bolatuly Turlyhanovtyń júldesine arnalǵan dástúrli XVIII týrnır qarsańynda uıymdastyrylyp otyr.
Sheberlik synybynda QazAqparat tilshisine arnaıy suhbat bergen Dáýlet Turlyhanov mundaı jarystar jastardy sportqa baýlýy úshin óte qajet ekenin aıtty.
«Almaty qalasy ákiminiń qoldaýymen túrli sporttyq baǵdarlamalar qolǵa alynyp, sonyń arqasynda «Halyq arena», «Almaty arena» sekildi sport keshenderinde tegin sport sektsııalary uıymdastyrylyp jatyr. Bul ata-analarǵa úlken kómek. Qazaq eli kúres ónerin baǵalaıdy. Biz sol palýan babalarymyzdyń izin jalǵastyryp kelemiz. Grek-rım kúresimen bala kúnimizden jattyǵyp halqymyzdyń qoldaýynyń arqasynda talaı arenalarda jeńisterge jettik. Anamyz Márzııa Aıtbaıqyzynyń bastaýymen Qazaqstanda eki týrnır ótkizip turamyz. Bireýi, grek-rım kúresinen eresekter arasynda Bolat Turlyhanovty eske alýǵa arnalǵan halyqaralyq týrnır. Ol 20 jyldaı ýaqyttan beri Semeı qalasynda ótkizilip keledi. Ekinishisi mine, 18 jyl qatarynan ótkizilip kele jatqan jasóspirimder arasyndaǵy Dáýlet Turlyhanov júldesi. Mundaı jarystar kóbirek ótkizilýi kerek. Balalar kúresip ósýi qajet. Bizde bala kúnimizde respýblıkalyq jarysta bir-birimizge qarap, taıtalasyp, kúshimizdi synasyp óstik. Sondyqtan, mundaı jarystar Halyq qaharmandarynyń atyna, belgili sportshylardyń júldesine uıymdastyrylyp tursa deımiz. Keshe Almatyda ótken qysqy Ýnıversıada qansha otbasyndaǵy balalardy sportqa qyzyqtyrdy», - dedi Dáýlet Turlyhanov.
Óz sózinde Dáýlet Turlyhanov týrnırge arnaıy kelgen burynǵy KSRO-ǵa belgili palýan, Olımpıada chempıony Kamandar Madjıdovtyń búgingideı sheberlik synybyn ótkizýi jas sportshylar úshin mártebe ekenin aıtty.
«Ataqty palýan Kamandar Madjıdov kelip jatyr. Eki kúndik týrnırde ol tek qana qonaq bolyp qana kelmeı, jas palýandar men jattyqtyrýshylarǵa óz tájirıbesinen sabaq beredi. Sabaq palýandarymyz úshn óte kerek», dedi Dáýlet Turlyhanov.
Aıta keteıik, 1-2 sáýir aralyǵynda ótetin respýblıkalyq týrnırge sportshylar Qazaqstannyń barlyq aımaqtarynan, sondaı-aq, Almaty men Astana qalalarynan qatysady.
Atap aıtqanda, boz kilemde Dáýlet Turlyhanovtyń, Jaqsylyq Úshkempirovtiń, Bolat Turlyhanovtyń, Haıs Aqqalıevtyń sport mektepteri men «Jas Qyran» memlekettik mekemesi, Qazaly aýdanynyń BJSM, «Dáýlet-Járkent» PSK (Almaty oblysy) jáne ózge sport uıymdarynyń jas palýandary beldesedi.
Respýblıkalyq týrnır on salmaq dárejesi boıynsha ótedi. Jarys (UWW) erejeleri boıynsha ótedi. Jeńimpazdar men júldegerlerge medal men dıplom, sondaı-aq baǵaly syılyqtar tabystalady.
