Dáýlet Turlyhanovtyń ulyna sot úkimi shyqty
Almaty qalalyq áskerı sotynda zańger Anna Dmıtrıevıch pen onyń kúıeýi Oleg Chernovty soqqyǵa jyqqan Dáýlet Turlyhanovtyń uly Nurasyl Bolatqa qatysty sot úkimi shyqty, dep habarlaıdy Kazinform agenttiginiń tilshisi.
Sotta anyqtalǵandaı, sottalýshy B. bıyl 11 aqpanda saǵat 02.00 shamasynda «Eva» túngi klýbynyń janynda buzaqylyq nıetpen jábirlenýshi, erli-zaıypty Ch-ǵa qasaqana ortasha aýyrlyqtaǵy dene jaraqatyn keltirgen.
«Sottalýshynyń kinási ózi moıyndaǵan aıǵaqtarymen, jábirlenýshiler men kýágerlerdiń aıǵaqtarymen, saraptama qorytyndysymen, oqıǵa bolǵan jerdi tekserý hattamalarymen dáleldendi», - dep habarlady vedomstvodan.
Prokýror sottalýshy B -ǵa 1 jyl 6 aı bas bostandyǵyn shekteý túrinde jaza taǵaıyndaýdy surady.
«Sot úkimimen Nurasyl Bolat QK 107-babynyń 2-bóligi 1 jáne 5-tarmaqtarynda kózdelgen qylmys jasaǵany úshin kináli dep tanyldy. Oǵan jaza túrinde 1 mln 700 myń teńge aıyppul taǵaıyndaldy», - dep habarlady áskerı sottan.
Sonymen qatar sottalýshydan jábirlenýshilerdiń paıdasyna jalpy 1 000 000 (bir mıllıon) teńge kóleminde moraldyq zııan óndirildi.
Úkim zańdy kúshine engen joq.
Eske sala keteıik, bıyl aqpanda N.Bolat Almatyda zańger Anna Dmıtrıevıch pen onyń kúıeýi Oleg Chernov soqqyǵa jyqqan edi.
Keıin sport qaıratkeri Dáýlet Turlyhanov balasynyń buzaqylyq áreketine baılanysty pikir bildirdi. Odan bólek, Dáýlet Turlyhanov ulynyń isine aralaspaıtynyn aıtty.
Al 2 shilde kúni ol merzimdi áskerı boryshyn ótep jatqan jeri – Qonaev garnızony áskerı bólimderiniń birinen qashyp ketken bolatyn. Keıin ol tabylyp, qyzmet atqaratyn ornyna jetkizildi. Almaty garnızony bólim bastyǵynyń buıryǵyna baǵynbaǵany jáne oryndamaǵany úshin ákimshilik jaýapkershilikke tartyldy.
