Dáýlet Turlyhanovtyń ulyn ýaqtyly esepke qoımaǵan QAJ komıteti qyzmetkerleri jaýapqa tartyldy

ASTANA. KAZINFORM – Májilis depýtaty Dáýlet Turlyhanovtyń uly Nurasyl Bolatty probatsııa qyzmetine ýaqtyly tirkemegen Qylmystyq-atqarý júıesi komıtetiniń qyzmetkerlerin tártiptik jaýapqa tartty. Bul týraly atalǵan komıtettiń baspasóz qyzmeti habarlaıdy. 

«Protsestik tártipti buzǵany úshin birqatar kináli tulǵa tártiptik jaýapkershilikke tartyldy», - deıdi Qylmystyq-atqarý júıesi komıtetinen.

Aıta ketsek, taıaýda áleýmettik jelide Májilis depýtaty Dáýlet Turlyhanovtyń bostandyǵy shektelgen uly Nurasyl Bolattyń túngi ýaqytta emin-erkin júrgen vıdeosy taraǵan edi.

Іstiń mán-jaıyn Qylmystyq-atqarý júıesi komıtetinen suraǵanymyzda: «N. Bolatqa qatysty úkimdi oryndaý probatsııa qyzmetine (tirkelgen mekenjaıy boıynsha) bıyl 14 tamyzda kelip tústi. Zańnamaǵa sáıkes probatsııalyq baqylaý sottalǵan adamdy esepke alǵan sátten bastap júzege asyrylady», - degen jaýap aldyq.

Eske sala keteıik, 2023 jyly aqpanda Nurasyl Bolat Almatyda zańger Anna Dmıtrıevıch pen onyń kúıeýi Oleg Chernovty soqqyǵa jyqqan edi.

Keıin sport qaıratkeri Dáýlet Turlyhanov balasynyń buzaqylyq áreketine baılanysty pikir bildirdi.

Odan bólek, Dáýlet Turlyhanov ulynyń isine aralaspaıtynyn aıtty. 

Al, ótken jyly 2 shilde kúni ol merzimdi áskerı boryshyn ótep jatqan jeri – Qonaev garnızony áskerı bólimderiniń birinen qashyp ketken bolatyn.

Keıin kóp ótpeı tabylyp, qyzmet atqaratyn ornyna jetkizildi. 

Almaty garnızony bólim bastyǵynyń buıryǵyna baǵynbaǵany jáne oryndamaǵany úshin ákimshilik jaýapkershilikke tartyldy.

2023 jyly 9 qazanda Dáýlet Turlyhanovtyń ulyna sot úkimi shyqty.

Prokýror sottalýshy B-ǵa 1 jyl 6 aı bas bostandyǵyn shekteý túrinde jaza taǵaıyndaýdy surady.

Bıyl mamyrda Joǵarǵy sot Dáýlet Turlyhanovtyń ulyna kesilgen úkimdi ózgertti.

Sodan soń Dáýlet Turlyhanov ulynyń sot úkimine qatysty pikir bildirdi.