Dáýlet Turlyhanov: Qazaqstanda áıelder kúresin damytýda kedergiler bar
ASTANA. KAZINFORM – Qazaqstan kúres federatsııasynyń prezıdenti Dáýlet Turlyhanov elimizdegi áıelder kúresiniń qazirgi jaǵdaıy jáne damý bolashaǵy týraly aıtty.
Federatsııa prezıdentiniń aıtýynsha, elimizde búginde áıelder kúresiniń damýynda úlken máseleler bar.
- Áıelder kúresi Halqaralyq olımpıada komıteti tarapynan olımpıada oıyndaryna kirgen sport túri. Barlyq el áıelder kúresin damytyp otyr. Al bizde jergilikti jerlerde qyzdar kúresiniń damýyna qarsy jumystar júrgizilip jatqan jaǵdaı bar. Ony memlekettik bas jattyqtyrýshy biledi. Endi oblystyq sport basqarmalarymen jumys istep, osy máseleni jergilikti deńgeıde sheshý kerek. Osy olımpıadalyq sport túrin biz damytýymyz kerek, - dedi ol.
Dáýlet Turlyhanov qazaq qyzdarynyń Rıo olımpıadasyndaǵy jetistigin eske saldy.
- 2016 jylǵy Rıo olımpıadasynda bizdiń qyzdar 1 kúmis, 2 qola medal jeńip alǵan bolatyn. Osydan keıin elimizde qyzdar kúresiniń damýynda úzilis bolyp qaldy. Óıtkeni jastar men jasóspirimder arasynda sportshylarymyz jetile almady. Statıstıkaǵa qarasaq, 2023 jyly ótken 6 jazǵy halyqtar spartakıadasynyń qyzdar kúresine bar-joǵy 115 sportshy qatysqan. El birinshiligine 17 jasqa deıin 169 sportshy, al 15 jasqa deıin 195 balýan qyz qatysqan. Alaıda, 20 jasqa deıingi jasóspirimder sanatynda tek 99 qyz baq synady. Oǵan basty sebep — mektep bitirgennen keıin keıbir qyzdar sportty jalǵastyrmaı, tastap ketýi; al keıbiri otbasyn quryp ketýi. Bul oılanatyn suraq, biz osy máselemen aınalysýymyz kerek. Al úkimet tarapynan barlyq qoldaýlar men barlyq jaǵdaı jasalǵan. Bıýjetten qomaqty qarajat bar, zaman talabyna saı sport keshenderi bar, - dedi federatsııa basshysy.
Buǵan deıin habarlaǵanymyzdaı, Astanadaǵy “Qazaqstan” jeńil atletıka kesheniniń baspasóz ortalyǵynda Respýblıkalyq «Grek-rım, erkin jáne áıelder kúresi federatsııasy» respýblıkalyq qoǵamdyq birlestiginiń aǵymdaǵy qyzmetine qatysty ózekti máselelerge arnalǵan baspasóz máslıhaty ótti.
Baspasóz máslıhatynda áıelder kúresi boıynsha bas jattyqtyrýshy Qaırat Saǵadıev balýan qyzdarymyz ne úshin Olımpıada joldamasyn ıelene almaǵanyn túsindirdi.
