Dáýlet Turlyhanov Qazaqstan kúres federatsııasynyń prezıdenti qyzmetinen ketti
ASTANA. KAZINFORM - Dáýlet Turlyhanov Qazaqstan kúres federatsııasynyń prezıdenti qyzmetinen ketti.
Bul jóninde ol Qazaqstan kúes federatsııasynyń paraqshasynda kópshilikke jarııa etti.
- Búgin men Qazaqstan kúres federatsııasynyń Prezıdenti qyzmetin aıaqtaý týraly sheshim qabyldadym. Bul sátti men tereń alǵys sezimimen qabyldaımyn. Óziniń júregin Qazaqstan kúresin damytýǵa arnap, sońǵy 4 jylda birge eńbek etken árbir janǵa – bapkerlerge, sportshylarǵa, óńirlik federatsııalarǵa, tóreshilerge, dárigerlerge, seriktesterimizge jáne kún saıyn tabandy eńbek etken barlyq azamattarǵa shynaıy alǵys aıtqym keledi. Meniń basshylyǵym kezinde elimiz maqtan tutarlyq nátıjelerge qol jetkizdi. Atap aıtqanda, Parıj-2024 Olımpıadasynyń kúmis júldesi eresekter arasynda 3 álem chempıony, 23 jasqa deıingi sportshylar arasynda 3 álem chempıony, 20 jasqa deıingi sportshylar arasynda 4 álem chempıony, 17 jasqa deıingi sportshylar arasynda 4 álem chempıony shyqty. Bul jeńister – bizdiń birtutas komandamyzdyń eńbegi, kúresimizdiń bolashaǵyna sengen, tabandylyq tanytqan, jankeshtilikpen jumys istegen adamdardyń ortaq jetistigi, - dedi Dáýlet Turlyhanov.
Sondaı-aq ol úlken joldy birge júrip ótkenin atap ótip, qazaq kúresiniń halyqaralyq arenadaǵy bedelin nyǵaıtqanyn jetkizdi.
- Іri halyqaralyq týrnırlerdi joǵary deńgeıde ótkizdik jáne jas talanttarǵa jańa múmkindikter ashtyq. Osy tarıhı kezeńniń bir bóligi bolý – men úshin úlken qurmet. Biraq sport tek sabaqtastyq pen alǵa jyljý bar jerde damıdy. Jańa komanda jańa kózqaras, tyń ıdeıalar jáne bizdiń súıikti sportymyzdy damytýǵa tyń serpin ákeletinine shyn júrekten senemin. Jańa prezıdentke jáne federatsııa ujymyna zor tabys tileımin. Árbir qadam bizdi jańa jeńisterge, jańa chempıondarǵa, elimizdegi barlyq kúres túrleriniń birdeı ári qarqyndy damýyna bastaı bersin. Senimderińizge, qoldaýlaryńyzǵa jáne birlesken eńbegimizge myń alǵys. Men Otanymyzǵa qyzmet etýden eshqashan bas tartpaımyn. Qazaqstandy damytý – meniń basty basymdyǵym jáne elge, qoǵamǵa paıda tıgize alatyn kez kelgen jerde óz úlesimdi qosa beretin bolamyn, - dedi D. Turlyhanov.
Eske salsaq, budan buryn Dáýlet Turlyhanov Azııa kúres federatsııasy basshylyǵynan ketti.