Dáýlet Turlyhanov Almat Kebispaevtyń daýǵa qalýyna qatysty pikir bildirdi

Májilis depýtaty keleńsiz jaǵdaı týraly habardar ekenin, kináli jaq zań aıasynda jaýapqa tartylýy múmkin ekenin áleýmettik jelide jazdy. 

"Bul keleńsiz jaǵdaı týraly men habardarmyn. Qalaı bolǵanyn estidim.. Ókinishke qaraı, bul kez kelgen qalada bolyp turatyn turmystyq jaǵdaı. Ony boldyrmaýǵa tyrysý kerek, árıne. Biraq, bes saýsaq birdeı emes, ár adam balasynyń óziniń jaratylysyna, tárbıesi men mádenıettiligine baılanysty. Oryn alǵan oqıǵa boıynsha eki tarap ózderi sheshimge keler. Zań qorǵaý organdary mán-jaıdy saraptap, qorytyndy shyǵarar! Kináli jaq zań aıasynda jaýapqa tartylar! Ol - ýaqyt enshisinde", - dep jazdy halyq qalaýlysy.

Dáýlet Turlyhanov, sondaı-aq, máseleniń baıybyna barmaı, baıbalam salýdyń qajeti joq ekenin atap ótti.

"Almat – chempıon! Men ony biraz jyldardan beri bilemin! Óte aqyldy, parasatty, sypaıy jigit. Talaı el namysyn qorǵap, týymyzdy jelbiretti. Birneshe dúrkin Azııa chempıony, álem júldegeri atandy.. Qazir Almat Serbııadaǵy Álem chempıonatyna daıyndyq ústinde. Sondyqtan da máseleniń anyq-qanyǵyna jetpeı, aldyn ala sportshymyzdy tyǵyryqqa tiremeıik, dostar! Dál qazir Almatqa qoldaý qajet! Alda - el abyroıy, júlde, Olımpıada joldamasy!
Bolǵan jaǵdaı zań jolymen ýaqytynda sheshiledi", - dep jazdy Parlament Májilisiniń depýtaty Dáýlet Turlyhanov.

Eske salsaq, Almatyda saýda ortalyqtarynyń birinde Almat Kebispaevtyń bir jigitti uryp qulatqany týraly aqparat taraǵan bolatyn.