«Dáýlet» sport keshenin jóndeýge 70 mln teńge qajet - elorda ákimdigi
NUR-SULTAN. QazAqparat – Bıyl elordada sporttyq-medıtsınalyq ortalyq ashylmaq. Bul týraly Nur-Sultan qalasy dene shynyqtyrý jáne sport basqarmasy basshysynyń orynbasary Almas Abaev málim etti, dep habarlaıdy QazAqparat tilshisi.
«Bıyl elordada sporttyq-medıtsınalyq ortalyq ashamyz. Búginde ǵımarat taýyp, ony jóndeýden ótkizip jatyrmyz. Búginde ortalyqqa qajetti qural-jabdyq satyp alyndy. Atalǵan mekemeniń kommýnaldyq tólemderi úshin 30 mln teńge kerek. Sonymen qatar qaladaǵy «Dáýlet» sport kesheni de jóndeýdi talap etedi. Aǵymdyq jóndeýge 70 mln teńge qajet. Osy somanyń ishine tennıs zaldaryn jetildirý de kiredi. Ata-analardan balalar sportyna nege mán berilmeıdi jáne sport mektepteri nege az degen suraq jıi túsip jatady. Osy máseleni sheshý maqsatynda memlekettik tapsyrysty arttyrmaqpyz», - dedi Almas Abaev qalalyq máslıhattyń turaqty komıssııasynyń otyrysynda.
Sondaı-aq, basqarma ókili balalar men jasóspirimder arasynda sportty damytýda zaldar men tıisti qural-jabdyqtyń jetispeıtindigin moıyndap otyr.
«Qalamen qatar elorda irgesindegi turǵyn úı alqaptaryn da umytpaý kerek. Osy oraıda Kóktalda sport sektsııalaryn ashtyq, búginde jattyǵý bastalyp ketti. Odan bólek, Óndiris turǵyn úı alqabynda da sporttyq sektsııalar ashý máselesi qaralyp jatyr», - deıdi ol.
Buǵan deıin habarlaǵanymyzdaı, elorda ákimdigi sportty damytýǵa qosymsha qarajat surap otyr.
