Dáýlet Nııazbekov: Jas balýandarymyz alǵash ret kásibı pomost qoldanǵan boz kilemde kúresti

ASTANA.KAZINFORM – Elordadaǵy «Qazaqstan» jeńil atletıka kesheninde erkin kúresten 20 jasqa deıingiler arasyndaǵy Qazaqstan chempıonaty máresine jetti.  Osy oraıda erkin kúresten U20 ulttyq qurama bas bapkeri Dáýlet Nııazbekov Kazinform tilshisine el birinshiligi týraly pikirin aıtty.

Bapker el chempıonatynyń óte joǵary deńgeıde ótkenin atap ótti.

- Chempıonat halqaralyq deńgeıde uıymdastyryldy. Sebebi jas balýandarymyz el birinshiliginde alǵash ret kásibı pomost qoldanǵan boz kilemde kúresti. Osyǵan deıin ondaı bolmaǵan edi. Jarys alańyndaǵy atmosfera óte keremet. Osynyń barlyǵy jastardyń halqaralyq jarystarǵa beıimdelýine jaǵdaı jasaý. Bolashaqta olar osyndaı úlken dodalarǵa barǵanda qobaljymaıdy, - deıdi ol.

Dáýlet Nııazbekovtyń aıtýynsha, jas jeńimpazdardy qarjylaı qoldaý olardyń damýyna óz septigin tıgizedi.

- El tarıhynda alǵash ret ishki birinshilikte jeńimpazdardy qarjylaı marapattap jatyr. Bul sportshylardyń damýyna óz septigin tıgizedi dep oılaımyn. Jalpy, chempıonattan kóptegen jas sportshylarymyz shyńdalyp shyǵady. Aldaǵy ýaqytta, jeńimpazdar halqaralyq jarystardan júldege ilinedi dep úmittenemin,- dedi bapker.

Sóz sońynda, Dáýlet Nııazbekov qazaqstandyq balýandardyń Albanııanyń Tırana qalasynda ótken kúres túrleri boıynsha reıtıngilik týrnırdegi jeńisin joǵary baǵalady.

Osyǵan deıin habarlaǵanymyzdaı, Astanada grek-rım, erkin jáne áıelder kúresinen U17 jáne U20 jas arasyndaǵy Qazaqstan chempıonaty máresine jetti.

Sonymen qatar qazaqstandyq balýandar Albanııanyń Tırana qalasynda ótken kúres túrleri boıynsha reıtıngilik týrnırde 11 medal jeńip aldy.