Dáýlet, Dımash, Dına: Shymkentte jyl basynan beri ekinshi úshem dúnıege keldi

ShYMKENT. KAZINFORM - Shymkent qalalyq perınataldyq ortalyǵynda taǵy úshem dúnıege keldi.

Sábıler men anasy búgin ortalyq mamandarynyń baqylaýymen úıine shyǵaryldy.

Qalalyq densaýlyq saqtaý basqarmasynyń habarlaýynsha, 30 qańtar kúni Aqsholpan Súleımenova dárigerlerdiń kómegimen úshemdi aman-esen ómirge ákeldi. Jańa týǵan nárestelerge ata-anasy Dáýlet, Dımash jáne Dına esimderin bergen.

- Úshemniń salmaqtary árqaısysy eki keliden asty. Ekinshi jáne úshinshi náresteler týǵannan keıin birden jan saqtaý jáne qarqyndy terapııa bólimshesine ornalastyryldy. Jaǵdaılary turaqtanǵan soń bir táýlikten keıin negizgi bólimshege aýystyryldy, - delingen habarlamada.

Barlyq úsh náreste ortalyq mamandarynyń baqylaýynda 11 táýlik bolyp, qoldanystaǵy klınıkalyq hattamalarǵa sáıkes tolyq medıtsınalyq kómek aldy. Shyǵarylý kezinde olardyń jaǵdaıy qanaǵattanarlyq dep baǵalanyp, úıine jiberildi.

Aıta keteıik, otbasynda buǵan deıin tórt bala tárbıelenip jatyr, al úshemniń dúnıege kelýimen balalar sany jetige jetti.

Budan buryn Shymkentte 31 jastaǵy áıel úshem bosanyp, 7 balanyń anasy atanǵanyn jazǵan edik.