Daýys berýshilerdiń 88,6%-y jańa Konstıtýtsııany qabyldaıtyndaryn aıtqan – AMANAT saýalnamasy
ASTANA. KAZINFORM – «AMANAT» partııasynyń «Qoǵamdyq saıasat ınstıtýty» júrgizgen Exit poll nátıjesi Konstıtýtsııalyq reforma jónindegi respýblıkalyq referendýmǵa qatysýshylardyń 88,6%-y jańa Konstıtýtsııany qabyldaımyn dep daýys bergenin tirkedi.
Atalmysh saýalnamaǵa 200 daýys berý ýchaskesinen 24 myń azamat qatysqan. Exit poll nátıjesi boıynsha, referendýmǵa 72,1% daýys berýshiler kelgen. Ortalyq referendým komıssııasynyń resmı málimeti boıynsha, elde barlyǵy 9 126 850 azamat daýys berýge kelgen. Bul referendýmda daýys berýge quqyly azamattardyń 73,24 paıyzy degen sóz.
Referendýmda daýys bergen Memleket basshysy Qasym-Jomart Toqaev jańa Konstıtýtsııa jastarǵa arnalǵan temirqazyq ekenin aıtqan bolatyn.
Buǵan deıin Ortalyq kommýnıkatsııalar qyzmetiniń Jalǵan aqparatqa qarsy is-qımyl ortalyǵy aqparat keńistigindegi referendýmmen baılanysty jarııalanymdarǵa monıtorıng júrgizip bastaǵanyn eskertken edi.
Syrtqy ister mınıstrliginiń málimetine súıensek, referendým kúninde 9 myńnan astam Qazaqstan azamaty sheteldegi ýchaskelerde daýys bergen.
