Daýys berý ýchaskeleri Quryltaı saılaýyna ázir me
ASTANA. KAZINFORM — Qoǵamdyq uıymdar baıqaýshylary ýchaskelerdi aralap, olardyń saılaýǵa daıyndyǵyn qadaǵalady.
Baıqaýshylar daýys berý oryndarynyń múgedektigi bar azamattardy qabyldaýǵa, saılaýǵa esh kedergisiz qatysýǵa qalaı jaǵdaı jasaǵanyna basa mán berdi.
№ 181 ýchaskelik saılaý komıssııasy tóraǵasynyń orynbasary Zýhra Bıkenovanyń sózinshe, múgedektigi bar azamattar esh kedergisiz, emin-erkin daýys bere alady. Naqtyraq aıtsaq, arbaǵa tańylǵan kisiler ǵımaratqa kirýi úshin pandýs bar, dárethanaǵa qońyraý pernesi ornatylǵan. Sonymen qatar, zaǵıp nemese kórý qabileti tómen jandar úshin Braıl qarpimen jazylǵan paraqtar qoljetimdi. Sondaı-aq, budan basqa da qajettilikter qamtamasyz etilgen.
— Bizdiń ýchaskege Geıdar Alıev, Máńgilik El, Uly Dala jáne Aqmeshit kóshelerinde turatyn turǵyndar keledi. Bizde múgedektigi bar azamattardyń tizimi bar. Saılaýǵa bir kún qalǵanda, olarǵa habarlasyp, daýys berýge kele alatynyn nemese kele almaıtynyn anyqtaımyz. Eger óz betimen munda jete almasa, onda men qasyma ýchaskelik saılaý komıssııasynyń taǵy bir múshesin jáne quqyq qorǵaý organynyń bir ókilin ertip, úıine baramyn. Onda saılaý jáshigin aparamyn. Ýchaskege kele almaıtyn múgedektigi bar azamattardyń úıinde otyryp, daýys berýine kómektesemiz, — dedi Zýhra Bıkenova.
Áıtse de, qoǵamdyq uıymdar baıqaýshylary birqatar eskertý jasady.
Máselen, «Erkindik qanaty» qoǵamdyq qorynyń atqarýshy dırektory Elena Shvetsova Qazaqstan BUU-nyń Múgedekterdiń quqyqtary týraly konventsııasyn 2015 jyly ratıfıkatsııalaǵanyn eske saldy.
— Ýchaskelerde múgedektigi bar azamattarǵa arnalǵan kabınalar bolýy tıis. Saılaý ǵımaratyna jáne daýys berý ornyna arbaǵa tańylǵan kisiler kire alýy úshin onda tabaldyryq bolmaýy kerek. Tipti, kishigirim tabaldyryq bolsa da, tósenishtermen tegistelýi qajet. Sonda arba dóńgelegi barynsha jeńil ótedi ári zaǵıp ne kórý qabileti tómen jandar da súrinip ketpeıdi. Sonymen qatar, ár ýchaskede kompıýter jáne qulaqqap qamtamasyz etilýi tıis. Ár kompıýterge Ortalyq saılaý komıssııasy daıyndaǵan baǵdarlama júktelýi kerek. Zaǵıp ne kórý qabileti tómen jandar Braıl qarpin oqı almasa, olar aýdıo túrindegi aqparatty, partııalardyń tizimde neshinshi turǵanyn qulaqqappen tyńdap, daýys berýine jaǵdaı jasaý qajet, — dedi ol.
Aıta keteıik, buǵan deıin kanadalyq bıznes ókili Erık Pardı Quryltaı saılaýy Qazaqstanǵa degen halyqaralyq senimdi kúsheıte alatynyn aıtqan edi.
