Daýys berý nátıjelerine yqpal etýi múmkin buzýshylyqtardy baıqamadyq — TMD baıqaýshylary
ASTANA. KAZINFORM — Táýelsiz memleketter dostastyǵy baıqaýshylar mıssııasynyń basshysy Igor Petrıshenko Qazaqstandaǵy Quryltaı saılaýyna halyqaralyq baıqaýshylar tarapynan júrgizilip jatqan monıtorıng nátıjeleri týraly aıtty.
Onyń málimdeýinshe, TMD baıqaýshylar mıssııasy halyqaralyq baqylaý salasynda mol tájirıbege ıe. Qazaqstandaǵy búgingi saılaý mıssııanyń eldegi 20-shy, al jalpy 135-shi halyqaralyq baıqaý mıssııasy bolyp otyr.
— Men Táýelsiz memleketter dostastyǵy mıssııasynyń atynan sizderdi quttyqtaýǵa qýanyshtymyn. Bizde halyqaralyq baıqaý júrgizý boıynsha jetkilikti tájirıbe bar. Bul — bizdiń 135-shi mıssııamyz jáne Qazaqstan Respýblıkasyndaǵy 20-shy mıssııamyz, — dedi Igor Petrıshenko.
Onyń aıtýynsha, mıssııa quramyna 190 adam kirgen. Baıqaýshylar Qazaqstannyń 14 óńirinde, sondaı-aq Ortalyq saılaý komıssııasy sheteldegi Qazaqstannyń dıplomatııalyq ókildikterinde uıymdastyrǵan 79 saılaý ýchaskesiniń isine baqylaý júrgizip jatyr.
— Biz óz jumysymyzdy 3 tamyzdan bastadyq. Uzaq merzimdi baıqaýshylarymyz daıyndyq jumystary kezinde shamamen 7 óńirde boldy. Sonymen qatar Ortalyq saılaý komıssııasymen, aýmaqtyq jáne ýchaskelik saılaý komıssııalarymen belsendi jumys júrgizdik. Saılaýǵa óz kandıdattaryn usynyp, bıýlletenge engen jeti saıası partııanyń barlyǵymen kezdestik, — dedi mıssııa basshysy.
Igor Petrıshenko saılaý ýchaskeleri ashylǵan sátten bastap baıqaýshylardyń daýys berý protsesiniń uıymdastyrylýyn baqylaǵanyn atap ótti.
— Búgin saılaý ýchaskeleri ashylǵan sátten bastap biz jáne basqa óńirlerdegi ókilderimiz saılaý protsesiniń qalaı uıymdastyrylǵanyn baqyladyq. Ánurannyń saltanatty oryndalýy, alǵashqy saılaýshylardyń kelýi — barlyǵy naqty uıymdastyrylǵan. Ýchaskelik komıssııa tóraǵasy, hatshysy jáne músheleri úılesimdi jumys istep, saılaýshylarǵa oń ári óte jyly qarym-qatynas tanytty, — dedi ol.
Ol Astanada tańerteń jańbyrly aýa raıy bolǵanyna qaramastan, saılaý ýchaskelerinde azamattardyń belsendiligi baıqalǵanyn aıtty.
— Astanada belgili bir ýaqytta jańbyrly aýa raıy boldy, al basqa óńirlerde aýa raıy qolaıly edi. Soǵan qaramastan, Astanada da saılaýshylardyń belsendiligi baıqaldy. Tipti jekelegen saılaý ýchaskelerinde eki-úsh urpaqtyń birge kelip, óz azamattyq boryshyn oryndaǵanyn kórdik, — dedi mıssııa basshysy.
Onyń aıtýynsha, saılaý ýchaskelerinde qajetti atrıbýtıka men aqparattyq-anyqtamalyq materıaldardyń barlyǵy Ortalyq saılaý komıssııasy belgilegen talaptarǵa sáıkes ornalastyrylǵan.
— Biz birde-bir saılaý ýchaskesinde qandaı da bir kemshilik, ásirese daýys berý nátıjelerine yqpal etýi múmkin buzýshylyqtardy baıqamadyq, — dep túıinedi TMD baıqaýshylar mıssııasynyń basshysy.
Aıta keteıik, belgııalyq baıqaýshy quryltaı saılaýy Ortalyq Azııa úshin mańyzdy kezeń ekenin aıtqan edi.
