Daýys berý kúni úgit-nasıhat júrgizýge tyıym salynǵan — Bekjan Qaramanov
ASTANA. KAZINFORM — Respýblıkalyq referendýmdy ótkizý barysynda zańdylyqtyń saqtalýy qatań qadaǵalanady.
Bul týraly Qoǵamdyq múddelerdi qorǵaý qyzmeti basqarmasynyń basshysy Bekjan Qaramanov Ortalyq kommýnıkatsııalar qyzmeti alańynda ótip jatqan «Referendým — 2026» onlaın-marafony barysynda málimdedi.
— Daýys berý kúni úgit-nasıhatqa tyıym salynady. Qoǵamdyq pikirge júrgizilgen saýalnama nátıjelerin buqaralyq aqparat quraldarynda jáne onlaın platformalarda jarııalaýǵa bolmaıdy. Mundaı saýalnamalardy daýys berý ótetin úı-jaılarda nemese ýchaskelerde júrgizýge de tyıym salynǵan. Sondyqtan barlyq azamatty zań talaptaryn múltiksiz oryndaýǵa shaqyramyn, — dedi Bekjan Qaramanov.
Spıker sózinshe, bul talaptardy saqtamaý Ákimshilik quqyq buzýshylyq týraly kodekstiń 102-shi jáne 120-baptary boıynsha ákimshilik jaýapkershilikke ákep soǵady. Sondaı-aq ol referendýmǵa qatysty ótinishter máselesine de toqtaldy.
— Referendýmǵa baılanysty ótinishter bolǵan jaǵdaıda, prokýratýra organdary men sottar olardy dereý qaraýǵa mindetti. Qazirgi ýaqytta prokýratýra men sottarǵa mundaı ótinishter túsken joq. Jalpy daýys berý protsesi quqyqtyq alańda ótip jatyr. Referendým ótkizý kezinde zańdylyqtyń saqtalýyn qamtamasyz etý jumystary jalǵasýda, — dedi ol.
Aıta keteıik, daýys berý barysyndaǵy qoǵamdyq tártip tolyq baqylaýda.
