Daýys berý Qazaqstannyń ishki zańnamasyna sáıkes ótip jatyr – halyqaralyq baıqaýshy
ASTANA. KAZINFORM – TMD elderi atynan kelgen halyqaralyq baıqaýshy Leonıd Anfımov atom elektr stantsııasyn salý boıynsha respýblıkalyq referendýmnyń ótý barysyna qatysty pikir bildirdi.
«Ázerbaıjan, Belarýs, Qyrǵyzstan, Tájikstan, Ózbekstan jáne Reseı Federatsııasynan 74 adam akkredıttelgen, odan bólek mıssııanyń quramyna TMD Atqarý komıtetiniń qyzmetkerleri kiredi», - dedi Leonıd Anfımov.
Halyqaralyq baıqaýshy atap ótkendeı, halyqaralyq mıssııalardyń qyzmetkerleri referendým ótkizý jónindegi ortalyq komıssııanyń qyzmetkerlerimen birneshe ret kezdesip, referendým ótkizý jónindegi ýchaskelik jáne okrýgtik komıssııalarǵa bardy. Olar referendým ótkizýge joǵary daıyndyq bolǵanyn atap ótti.
«Referendým ótkizý jónindegi ortalyq komıssııa aýqymdy jumys atqarǵanyn atap ótý kerek. Referendým jarııalanǵan kúnnen bastap bir aı ishinde ýchaskelik komıssııalardyń qyzmetkerlerin oqytý, trenıngter, semınarlar ótkizý, tehnıkalyq jaraqtandyrý, referendýmda daýys berýshilerdiń tizimin jasaý boıynsha orasan zor uıymdastyrýshylyq-tehnıkalyq jumys júrgizildi. Referendýmǵa jan-jaqty daıyndalǵan deýge bolady», - deıdi ol.
TMD elderinen kelgen baıqaýshylar (74 adam) elimizdiń 9 óńirindegi daýys berý ýchaskelerinde júr. Olar Aqmola, Shyǵys Qazaqstan, Batys Qazaqstan, Mańǵystaý, Túrkistan oblysy jáne Astana, Almaty men Shymkent qalasy.
TMD baıqaýshylary Shanhaı Yntymaqtastyq Uıymynyń, Túrki memleketteri uıymynyń jáne AÓSShK ókilderimen tyǵyz baılanysta jumys isteıdi.
«Daýys berý referendýmdar men saılaý naýqandaryn ótkizýdi reglamentteıtin Qazaqstan Respýblıkasynyń ishki zańnamasyna sáıkes ótip jatyr. Zań buzýshylyqtar joq. Meniń oıymsha, Qazaqstan Respýblıkasyndaǵy buǵan deıin ótken saılaý naýqandaryna baqylaý júrgizý tájirıbemizge súıensek, zań buzýshylyq bolmaıdy dep oılaımyn. Referendým uıymdasqan, tynysh jáne belsendi ótýde», - dep tolyqtyrdy L. Anfımov.
Buǵan deıin QR Syrtqy ister mınıstrligi sheteldegi azamattarymyzdyń daýys berýi belsendi ótip jatqanyn málimdegen edi.
