Daýyldy eskertý: 4 sáýirde kún raıy qandaı bolady

ASTANA. KAZINFORM — «Qazgıdromet» RMQ sınoptıkteri Qazaqstan boıynsha 2026 jylǵy 4 sáýir, senbige arnalǵan aýa raıynyń jalpy boljamyn jarııalady. 

Mamandardyń boljamynsha, atmosferalyq frontaldy bólikterdiń jyljýyna baılanysty elimizdiń kóp bóliginde qolaısyz aýa raıy beleń alady: naızaǵaı oınap, jańbyr jaýady, keı tusta qatty jaýyn-shashyn bolady, burshaq túsedi jáne daýyl turady.

Ásirese, elimizdiń soltústik-batysy men ońtústiginde qatty jaýyn-shashyn bolady.

Sondaı-aq, shyǵysta keń antıtsıklonnyń áserinen jaýyn-shashynsyz qurǵaq aýa raıy saqtalatyny habarlandy. 

— Respýblıka boıynsha beleń alatyn ortaq tabıǵı qubylystarǵa tuman, jeldiń ekpin alýy jatqyzylady, al soltústikte shańdy daýyl turýy múmkin, — delingen habarlamada. 

Sonymen qatar, Qyzylorda oblysynyń shyǵysynda, batysynda, soltústiginde, Túrkistan óńiriniń ortalyǵynda, soltústik-batysynda, shyǵysynda, Jambyl oblysynyń ortalyǵynda, Almaty oblysynyń soltústiginde, ońtústiginde, Jetisý oblysynyń ortalyǵynda órt qaýpi joǵary bolady dep kútiledi.

Aıta keteıik, buǵan deıin 4–6 sáýirge arnalǵan aýa raıy boljamyn jazdyq. Mamandardyń boljamynsha, aldaǵy úsh kúnde barıkalyq tsıklondar men antıtsıklondardyń aýysýyna baılanysty jaıly aýa raıy jaýyn-shashyndy kúndermen almasady.