Daýyl turyp, boran soqqan kúnderi keıbir salalardyń álsiz tustary baıqaldy – Aqtóbe oblysynyń ákimi
AQTÓBE. KAZINFORM - Aqtóbedegi boran kezinde júrgizýshiler baılanystyń nasharlyǵy men qyzmet kórsetý sapasyna syn aıtty. Ákimdikte ótken jıynda Ashat Shaharov kommýnaldyq qyzmettiń álsiz tustaryn atady.
Aqtóbe oblysy ákimi baspasóz qyzmetiniń habarlaýynsha, aımaq basshysy Ashat Shaharov daýyl turyp, boran soqqan kúnderi keıbir salalardyń álsiz tusy kórinip, birqatar máseleniń basy ashylǵanyn aıtty.
- Birneshe kún boıy joldar jabyldy. Bizde kempıngter az, qyzmet kórsetý joqtyń qasy. Júk jáne jeńil kólikterdiń qosalqy bólshekterin satatyn, azyq-túlik ónimderin jetkizý boıynsha qyzmet kórsetý salasy damymaǵan. Adamdar baılanystyń joqtyǵynan, qońyraý shala almaǵan. Jol boıynda ózge eldiń, ózge aımaqtardyń azamattary turyp qaldy. Olar jolda kóp júretindikten, sapaly qyzmet kórsetý degenniń ne ekenin jaqsy biledi. Biz joldar salyp jatyrmyz. Jol boıyndaǵy obektilerdi ashýǵa bıznes-qurylymdardy qyzyqtyrý qajet. Týrızmdi damytý, qyzmet kórsetý salasyn jaqsartý qajet. Barlyq respýblıkalyq mańyzy bar avtojoldar uıaly baılanyspen qamtylýy tıis,- dedi oblys ákimi.
Óńir basshysy qandaı da bir oqıǵanyń saldarymen kúresýden góri, kerisinshe olardyń aldyn alý úshin jumys isteý qajettigin eske saldy. Kommýnaldyq qyzmet, kásiporyndar jáne jergilikti atqarýshy organdardyń daıyn bolmaýy jumystyń nashar uıymdastyrylǵanyn kórstken. Bul tsıklon týraly «Qazgıdromet» sınoptıkteri aldyn ala eskertken.
- Eger aýa raıyn boljaýshylardan aldaǵy kúnderdiń nasharlaýyna qatysty habarlama kelip tússe, mundaı oqıǵa qaıtalanbaýy úshin brıgadalardy qala syrtyndaǵy sýmen jabdyqtaý nysandaryna aldyn ala jiberý kerek. Aqtóbedegi Altyn orda shaǵyn aýdany turǵyndarynyń sýsyz qalǵanyn elestetýdiń ózi múmkin emes. Sorǵylardy qosa almaǵan degen ne sumdyq?! Elektr jelileri boıynsha da máselelerdi sheshý qajet. Qala ákimi baý-baqsha ujymdarynyń turǵyndarymen kezdesti. «Energosıstema» JShS balansyna jeke jelilerdi berý jaǵdaıy qalaı?- dep Ashat Shaharov Energetıka jáne TKSh basqarmasy basshysynyń mindetin atqarýshy Nurtaı Sertaevtan mán-jaıdy surady.
Onyń aıtýynsha, óńirdegi elektr jelileriniń negizgi bóligi «Energosıstema» JShS balansynda. 7-9 aqpan aralyǵynda kúnniń buzylýy saldarynan oblystaǵy birqatar elektr jelisinde avarııalyq jaǵdaı bolyp, eldi mekender jaryqsyz qaldy. Tek 10 aqpan kúni barlyq eldi mekende elektrmen jabdyqtaý qalpyna keltirildi.
«Aqtóbedegi baý-baqsha ujymdaryndaǵy jeke elektr jelileri ıeleriniń toqsan paıyzǵa jýyǵy olardy kásiporyn balansyna berýge daıyn. Qalǵandary bas tartyp otyr. Bir ókinishtisi, sol jeke elektr jelileriniń ıeleri jaryq sóngen kezde jóndeý jumystaryn júrgizbeıdi, kómek kútip otyrǵan turǵyndarmen baılanysqa shyqpaıdy, - dep tolyqtyrdy kompanııanyń bas dırektory Erjan Jeksembınov.
Oblys ákimi kommýnaldyq qyzmetter jáne aýdan ákimdikteriniń basshylaryna osyndaı tótenshe jaǵdaı kezinde birlesip, is-qımyldardy pysyqtaýdy, jedel sheshimder qabyldaýdy jáne birge áreket etýdi usyndy. Ol osy syn saǵatta úılesimdi jumys istegen Hromtaý, Áıteke bı aýdandary ákimdikterin, tótenshe jaǵdaılar jáne polıtsııa departamentterin ózgelerge úlgi etti.
Eske salsaq, 7- aqpan kúni Aqtóbede aqtútek boran bolyp, ondaǵan aýyl aýyz sýsyz, jaryqsyz qaldy.
