Daýyl saldarynan Pavlodar óńirinde 33 ǵımarattyń shatyry zaqymdanǵan
PAVLODAR. KAZINFORM — Óńirlik tótenshe jaǵdaılar departamentiniń málimetinshe, ótken táýlikten beri qutqarýshylar jolda turyp qalǵan, boranda adasyp ketken jalpy sany 107 adamdy qutqarǵan.
— Qutqarylǵandardyń ishinde 6 bala bar. Sondaı-aq 62 adam evakýatsııalandy. Apattyq-qutqarý jumystary Pavlodar, Ekibastuz, Aqsý qalalary aýmaǵynda, sondaı-aq Maı, Aqtoǵaı, Baıanaýyl, Sharbaqty jáne Pavlodar aýdandarynda kóriný múmkindigi nólge teń jaǵdaıda júrgizildi. Ekpini sekýndyna 30 metrge deıin jetken qatty jeldiń saldarynan qazirgi ýaqytta tóben jabyndarynyń ushýy boıynsha 33 derek tirkeldi. Birqatar eldi mekende elektr jaryǵy óship qalǵan. Shyǵyndy anyqtaý jáne qalpyna keltirý jumystaryn úılestirý maqsatynda atalǵan óńirlerde jergilikti atqarýshy organdardyń tóraǵalyǵymen tótenshe jaǵdaılar jónindegi komıssııalar jumys istep jatyr, — dep habarlady departamentten.
Oblys boıynsha jalpy syıymdylyǵy 20 myńnan astam adamǵa arnalǵan 188 jylytý pýnkti daıyndalǵan. Olarda 4302 tósek-oryn bar. Jylytý pýnktterine 195 adam ornalastyrylǵan.
Qazirgi ýaqytta barlyq baǵyttar boıynsha joldar ashyq, tehnıka keptelisi baıqalmaıdy. Tirshilikti qamtamasyz etý nysandary shtattyq rejımde jumys istep tur.
Pavlodar oblysy boıynsha daýyldy eskertý áli de kúshinde saqtalyp tur. Aýa raıyn boljaýshylardyń málimetinshe, 11 naýryzda ońtústik-batystan soqqan jeldiń jyldamdyǵy 15-20 m/s, ekpini 23-28 m/s, keı jerlerde 30 m/s-qa deıin jáne odan da artyq bolady dep kútilip otyr. Ekpindi jel 12 naýryzda kúni de saqtalady, jyldamdyǵy sekýndyna 23-28 metrge deıin jetýi yqtımal.
Qutqarýshylar turǵyndardy qaýipsizdik sharalaryn saqtaýǵa jáne qolaısyz aýa raıy kezinde uzaq saparlardan bas tartýǵa shaqyryp otyr.
Eske sala keteıik, 10 naýryz kúni Pavlodarda aq tútek borannyń saldarynan jol apattary jıilep, bir aýdan jaryqsyz qaldy.
Sondaı-aq daýyl saldarynan Aqsý ferroqorytpa zaýytynda murjanyń bir bóligi qulaǵan.