Daýyl saldarynan Aqsý ferroqorytpa zaýytynda murjanyń bir bóligi qulaǵan

PAVLODAR. KAZINFORM — Kásiporynnyń habarlaýynsha, oqıǵa óndiristik protsestiń jalpy jumysyna áser etken joq. Barlyq negizgi tehnologııalyq úderis qalypty rejımde jalǵasyp jatyr. 

Búgin Aqsý ferroqorytpa zaýytynyń aýmaǵynda ornalasqan № 1 balqytý tsehynda daýyldyń saldarynan № 15 peshtiń tútin murjasynyń bir bóligi qulap túsken.

— Oqıǵa saldarynan zardap shekkender joq. Oqıǵa jergilikti sıpatqa ıe jáne óndiristik protseske áser etken joq. Atalǵan nysanǵa tehnıkalyq tekserý belgilengen merzimderge sáıkes 2023 jyly júrgizilgen, — dep habarlady «Qazhrom» transulttyq kompanııasynan.

Qazirgi ýaqytta kásiporynda aýa raıynyń qolaısyzdyǵyna baılanysty jedel shtab qurylyp, jaýapty qyzmetterdiń kezekshiligi uıymdastyrylǵan. Mamandar nysannyń jaǵdaıyn baqylaýda ustap, qaýipsizdik sharalaryn kúsheıtti.

Eske sala keteıik, Pavlodarda aq tútek borannyń saldarynan jol apattary jıilep, bir aýdan jaryqsyz otyr.