Daýyl saldary: Atyraýda úılerdi jóndep, qasbetin aýystyrýǵa 400 mln teńge bólindi

ATYRAÝ. KAZINFORM — Byltyr jeltoqsan aıynda Atyraý qalasynda bolǵan dúleı daýyl saldarynan birqatar kópqabatty turǵyn úıdiń shatyry ushyp, qasbetteri zaqymdanǵan edi. 

Endi qaladaǵy zardap shekken úılerdi qalpyna keltirý jumystary kezeń-kezeńimen júzege asyrylmaq. Bul týraly Atyraý qalalyq turǵyn úı-kommýnaldyq sharýashylyǵy jáne turǵyn úı ınspektsııasy bólimi sektorynyń bas mamany Erbol Aıtqalıev málimdedi.

Onyń aıtýynsha, Almagúl, Balyqshy jáne Nursaıa yqsham aýdandarynda ornalasqan shamamen 10 kópqabatty turǵyn úıdi qalpyna keltirý úshin aldaǵy ýaqytta ashyq konkýrs ótkizý josparlanyp otyr. Qazir jumystyń jobasy jasalyp jatyr.

— Osy jyly jergilikti bıýdjet esebinen Abaı kóshesindegi № 11, 13, 14A jáne 16A kóppáterli turǵyn úılerdiń biryńǵaı sáýlettik kelbetin saqtaý maqsatynda qasbeti men shatyrlaryna kúrdeli jóndeý júrgizý josparlanǵan. Qazir jarııalanǵan ashyq elektrondy konkýrs nátıjesinde qurylys jumystaryna jaýapty merdiger mekeme anyqtalý ústinde, — dedi Erbol Aıtqalıev.

Bul úılerdiń shatyryn jóndep, qasbetin aýystyrý úshin jergilikti bıýdjetten 400 mln teńgege jýyq qarajat bólinip otyr.

Budan bólek, osy baǵdarlama aıasynda taǵy 12 kópqabatty turǵyn úıdiń qasbeti men shatyrlaryna kúrdeli jóndeý júrgizý úshin jobalyq-smetalyq qujattama ázirlenip, qazir saraptama qorytyndysy daıyndalyp jatyr. Oń qorytyndy alynǵan jaǵdaıda tıisti qurylys jumystary bastalmaq.

Osyǵan deıin ónerkásip pen turǵyn úıler arasyndaǵy qaýipsizdik aımaqtaryn belgileý jeńildetiletinin jazǵan edik. 

Sondaı-aq, byltyr 20,1 mln sharshy metr turǵyn úı paıdalanýǵa berilgenin habarladyq.