Daýyl men nóser jaýyn: Aqtóbeniń Qaraýylkeldi aýylynda 73 úı qaıta salynyp jatyr
AQTÓBE. KAZINFORM — Tabıǵı sıpattaǵy tótenshe jaǵdaı kezinde 220 úı jóndeýge jaramdy dep tanyldy. Al 73 úıdi qaıta salýǵa sheshim qabyldandy.
Baıǵanın aýdanynyń ortalyǵy Qaraýylkeldi aýylyndaǵy daýyl men nóser jaýynnan keıin 254 turǵyn úı, 14 áleýmettik nysan, 24 kásipkerlik sýbektisi jáne 6 ákimshilik ǵımarat zaqymdanǵany týraly aıtyldy. Sonyń ishinde úsh mektep pen úsh balabaqshada jóndeý jumystary aıaqtaldy. Qazir mektep-ınternat jáne tehnıkalyq kolledjde aǵymdaǵy jóndeý, al aýdandyq dene shynyqtyrý-saýyqtyrý kesheninde kúrdeli jóndeý jumystary júrgizilip jatyr. Sonymen birge shatyry túgel jaramsyz bolyp qalǵan Jastar resýrstyq ortalyǵy kúrdeli jóndeýden ótedi.
— Zalaldy baǵalaý qorytyndysy boıynsha daýyldan zardap shekken 220 jeke turǵyn úıdiń ıelerine ótemaqy tólenip jatyr. Tehnıkalyq tekserý nátıjesinde 73 jeke turǵyn úı turýǵa jaramsyz dep tanyldy. Qazirgi ýaqytta atalǵan úılerdiń ornyna jańa turǵyn úıler salynyp jatyr. 10 shilde — 25 tamyz aralyǵynda tótenshe jaǵdaı kezinde zardap shekken turǵyndardy ýaqytsha ornalastyrý úshin mektep-ınternat bazasynda 100 oryndyq evakýatsııalyq pýnkt jumys istedi. Evakýatsııalyq pýnktke barlyǵy 37 adam ornalastyryldy. Qazirgi ýaqytta evakýatsııalyq pýnktte turǵyndar joq. Aýdandaǵy jaǵdaı turaqty. Tótenshe jaǵdaıdyń saldaryn tolyq joıý jónindegi jumystar jalǵasyp jatyr, — dep habarlady Aqtóbe oblysy ákiminiń baspasóz qyzmeti.
Eske salsaq, qatty daýyl 9-shilde kúni boldy. Baılanys munarasy qulap, úsh adam zardap shekti. Onyń bireýi júkti áıel. Keıin ákimdik daýyldan keıingi aýyldyń kúıin kórsetti. Jaryqsyz qalǵan aýylǵa birneshe aýdannan arnaıy top bardy.
