Daýyl kezinde qaza tapqan aqsýlyq áıeldiń otbasyna kómek kórsetildi
PAVLODAR. KAZINFORM - Marqum Marına Pahomova tiri bolsa 57 jasqa keler edi. Ol Aqsý qalasyndaǵy №19 balabaqshada horeograf bolyp eńbek etken.
Pavlodar oblysynyń ákimi Asaıyn Baıhanovtyń tapsyrmasy boıynsha daýyl kezinde qaıtys bolǵan Marına Valerevna Pahomovanyń otbasyna qarjylyq qoldaý kórsetildi.
- Atap aıtqanda, jumys istegen eńbek kezeńi úshin ótemaqy, BJZQ-dan bólingen jerleý rásimine arnalǵan qarajat, jerleý rásimin uıymdastyrýǵa qarajattar bólindi. Jınalǵan barlyq qarajat jerleý rásimin uıymdastyrýǵa, as berýge, sondaı-aq eskertkish tas satyp alýǵa jumsaldy. Munyń barlyǵymen volonterlar aınalysyp jatyr. Janaza rásiminde týǵan-týystaryn tasymaldaý úshin avtobýs berildi, - dep habarlady Pavlodar oblysy ákiminiń baspasóz qyzmetinen.
Sondaı-aq nesıeleri tólenedi. Budan bólek, 2025-2026 jyldar kezeńi úshin (eki jyl) qaza bolǵan adam turǵan páterdegi jylý men sýdyń kommýnaldyq qyzmetterine aqy tólenetin bolady.
Eske sala keteıik, bıylǵy 19 maýsym kúni Aqsý qalasynda qatty jelden qulaǵan aǵash áıeldi mert qyldy.