Daýyl, burshaq: Jetisý oblysynda kún kúrt sýytady
ASTANA. KAZINFORM — Jetisý oblysy boıynsha «Qazgıdromet» RMK fılıalynyń málimetinshe, 16 sáýir saǵat 20:00–den 17 sáýir saǵat 20:00–ge deıin óńirde naızaǵaımen qatar jańbyr jaýady.
Oblystyń shyǵysynda jáne taýly aımaqtarynda jaýyn-shashynnyń mol túsýi boljanýda. Keı jerlerde burshaq jaýyp, ekpindi jel soǵýy múmkin.
Batystan soǵatyn jeldiń jyldamdyǵy 15–20 m/s bolady, al oblystyń soltústigi men shyǵysynda ekpini 23–28 m/s-qa deıin kúsheıedi. Alakól kólderi mańynda kúndiz jeldiń jyldamdyǵy 30 m/s jáne odan da joǵary bolýy yqtımal.
Túnde aýa temperatýrasy 5–10 gradýs jyly bolady, alaıda soltústik jáne taýly óńirlerde 3 gradýs aıazdan 2 gradýs jylýǵa deıin úsik júrýi múmkin. Kúndiz aýa temperatýrasy 10–15 gradýsqa deıin kóteriledi, al soltústikte jáne taýda 0–5 gradýs shamasynda bolady.
Taldyqorǵanda bultty aýa raıy kútiledi, keı ýaqytta jańbyr jaýyp, naızaǵaı oınaıdy, kúndiz burshaq jaýýy múmkin. Batys jeli 9–14 m/s, ekpini 15–20 m/s-qa deıin jetedi. Aýa temperatýrasy túnde 7–9, kúndiz 10–12 gradýs jyly bolady.
Aldyn ala boljam boıynsha, 18–19 sáýir kúnderi oblystyń ońtústigi men shyǵysynda naızaǵaıly jańbyr saqtalady. Taýly aımaqtarda túnde qar jaýýy, al kúndiz jańbyr men qar aralas jaýyn-shashyn kútiledi. Túngi jáne tańerteńgi ýaqytta keı jerlerde tuman túsýi múmkin.
Jel soltústik-shyǵys baǵytqa aýysyp, jyldamdyǵy 9–14 m/s bolady, ekpini 15–20 m/s-qa deıin kúsheıedi. Alakól mańynda jeldiń ekpini 23–28 m/s-qa jetedi.
Túnde aýa temperatýrasy 1–6 gradýs jyly bolsa, oblystyń batysy men soltústiginde 1–3 gradýsqa deıin úsik júredi. Taýly aımaqtarda temperatýra 3–8 gradýs aıazǵa deıin tómendeıdi. 18 sáýir kúni kúndiz 8–13 gradýs jyly, al 19 sáýirde 13–18 gradýsqa deıin jylynady. Taýly óńirlerde 3–8 gradýs jyly bolady.
Buǵan deıin Aqtóbe oblysynyń birneshe aýdanynda jańbyr, qar jaýýy yqtımal ekenin jazdyq. Tótenshe jaǵdaılar qyzmeti jel kúsheıetinin aıtyp, eskertý jasady.
