Daýǵa qalǵan 40 qabatty keshen: Almaty ortalyǵyndaǵy alyp qurylys ne bolmaq
ALMATY. KAZINFORM – Almatyda 40 qabatty RAMS Beyond kesheniniń qurylysy áli de toqtap tur. Qala ákimdigi qurylysy toqtap turǵan nysan týraly jańa derektermen bólisti.
Tımırıazev kóshesi men Seıfýllın dańǵylynyń qıylysynda salynýy tıis bolǵan záýlim ǵımarat byltyr qoǵamda úlken daý týdyryp, qyzý talqylandy. Keıin nysandaǵy jumystar toqtap qaldy. Degenmen almatylyqtar arasynda bul aýmaqtyń aldaǵy taǵdyryna qatysty suraqtar áli de az emes. Jobanyń búgingi jaı-kúıin anyqtaý úshin agenttik Almaty qalasynyń sáýlet jáne qala qurylysy basqarmasyna saýal joldady.
Vedomstvonyń málimetinshe, bul jer telimi «BR Construction Qazaqstan» JShS (burynǵy ataýy — «Berton Ram» JShS) kompanııasyna tıesili. Qurylys kompanııasyna qatysty ákimshilik sharalar qoldanylyp, arnaıy nusqama berilgennen keıin atalǵan aýmaqtaǵy qurylys-montaj jumystary tolyqtaı toqtatylǵan. Basqarma ókilderi jumysty qaıta bastaý, jobanyń ólshemderin ózgertý nemese nysanǵa qatysty basqa da sheshimder qabyldaý máselesi quzyrly organdardyń qorytyndysy negizinde zańda belgilengen tártippen ǵana sheshiletinin atap ótti.
- Qazir bul aýmaqta jańa nysan salýǵa nemese basqa bir jobany júzege asyrýǵa ruqsat qujattary berilgen joq, — delingen basqarma jaýabynda.
Jer teliminiń maqsatty baǵyty
Jyljymaıtyn múliktiń biryńǵaı memlekettik kadastry kartasynyń málimetinshe, bul jer teliminiń maqsatty baǵyty — kópfýnktsıonaldy turǵyn úı keshenin salý jáne paıdalaný. Qazirgi ýaqytta Almaty qalasynyń Bas josparyna túzetýler engizilip jatyr. Osy jumystar aıasynda atalǵan aýmaqty odan ári damytýdyń negizgi sáýlettik sheshimderi men talaptary aıqyndalmaq.
– Jerdiń maqsatty baǵytyn ózgertý máselesi jańartylǵan bas jospar bekitilgennen keıin qoldanystaǵy zańnama talaptaryna saı qaralyp, naqtylanady, - dep atap ótti vedomstvodan.
Eske salaıyq, byltyr RAMS QAZAQSTAN kompanııasy 2025 jyldyń qyrkúıek aıynan bastap BEYOND ALMATY jobasynyń bas merdigeri bolýdan bas tartqanyn habarlady.
