Dáýenovter otbasynyń eńbek ótili 409 jyldy quraıdy - Pavlodar oblysy
ASTANA. QazAqparat - Pavlodar oblysy Sharbaqty aýdany Jylybulaq negizgi mektebiniń bıologııa jáne geografııa pániniń muǵalimi Nurlan Dáýenovtiń otbasynda 18 ustaz bar. Januıa músheleriniń jalpy eńbek ótili bıyl 409 jyldy quraıdy, dep habarlaıdy pavlodarnews.kz.
«Eńbek - yrystyń bulaǵy, baqyttyń shyraǵy» degen sóz bizdiń otbasymyzdyń uranyna aınalǵan. Ákem bilim salasynda 42 jyl qyzmet etti. Al áýletimizdiń eń jas múshesi osy salada 5 jyldan beri eńbek etýde. Qazirgi ýaqytta shańyraǵymyzda jubaıym, balalarymdy qosqanda 18 muǵalim jumys isteıdi. Olardyń tórteýi bastaýysh, úsheýi tarıh, úsheýi bıologııa, ekeýi fızıka pániniń muǵalimderi. Bolashaqta áýletimizdiń nemere-shóbereleri de bizdiń osy izimizdi jalǵastyrady dep senemiz. Sebebi, ustazdyq - máńgilik mamandyq. Osylaısha, Elbasymyzdyń Máńgilik el ulttyq ıdeıasynyń júzege asýyna otbasymyzben úles qosýdamyz», - deıdi Nurlan Dáýenov.
Aıta keterligi, Nurlan Dáýenov jýyrda «Eńbek joly» oblystyq konkýrsynyń «Úzdik eńbek dınastııasy» nomınatsııasy boıynsha baıqaýdyń respýblıkalyq kezeńine joldama alǵan bolatyn. 30 qyrkúıek kúni ol Astanaǵa barady.
