Daýdy sotqa jetkizip, aıqaı-shýmen sheshkisi keletinder kóbeıdi - Jaqyp Asanov
«Azamattyq ister qatty kóbeıip keledi, 5 jylda eki ese. 2013 jyly 560 myń bolsa, byltyr 900 myńǵa jetti. Almatynyń Áýezov aýdanynda bir sýdıa kúnine 12 is pen materıaldy qaraıdy eken. 4 jylda júkteme 4 esege ósti. Sýdıalar qaǵazǵa kómilýde. Adamdardy konveınerge aınaldyrsaq, sapa qaıdan bolsyn. Ár is boıynsha eki tarap. Sonda qarap otyrsaq, 900 myń is bolsa, keminde 2 mıllıondaı adam sot áýresinde júr. Oǵan sot apparatyn, prokýrorlardy, advokattardy, sarapshylardy, sot oryndaýshylaryn qosyńyz. Bul jalpy bıýdjetke úlken salmaq. Al elimizdiń damýyna úlken kedergi», - dedi Jaqyp Asanov.
Onyń aıtýynsha, aryzdanyp júrgender bala-shaǵa, qalshyldaǵan qart emes. Kóbisi bıznes jasap, jumys oryndaryn ashyp, elge paıda keltirip júrgender. Olar kásibin ysyryp qoıyp, altyn ýaqyttaryn osyndaı sottasýǵa jumsaýda.
«Biri menshigin daýlaıdy, ekinshisi qaryzyn talap etedi, úshinshisi eńbekaqysyn óndirgisi keledi. Úıdegi problemasyn sotta sheshemin deýshiler de kóp. Aǵasy inisimen, ákesi balasymen sottasyp jatqan jaǵdaı az emes. Kásipkerden «jaǵdaıyń qalaı?» dep surasań «bireýmen sottasyp jatyrmyn» degendi jıi estısiń. Sonda qalaı? Tabıǵatynan sabyrly, janjaldy jaqtyrmaıtyn halqymyz daýǵa qumar bolyp ketkeni me? Basymyz pispeı qalsa, dereý sotqa júgiremiz. Qıt etsek sol. Ekiaradaǵy daýdy sot arenaǵa shyǵaryp, aıqaı-shýmen sheshkimiz keledi. Bitimge kelý, tatýlasý, kelisý mádenıetimiz qaıda joǵalyp ketti?», - dedi Joǵarǵy sot tóraǵasy.
Sonymen qatar sotqa aryz bermeı jatyp, tanys izdeı bastaıtyndyǵymyzdy da synady.
«Sotta aǵam bar, kókem bar dep qorqytamyz. Sondaǵy maqsat ádildik emes. Opponentten ósh alý, abroıyn aırandaı tógý. Sondyqtan Elbasymyz damýymyzǵa kedergi bolatyn osyndaı ádetterden arylýymyz qajet dep shegelep aıtty. Rýhanı jańǵyramyz desek, sonyń negizigi bir sharty osy», - dedi ol.
