Daý týǵyzǵan kólik Taldyqorǵannyń eks-ákiminiń ulyna tıesili bolyp shyqty
TALDYQORǴAN.QazAqparat - 19 naýryz kúni Almatyda eshbir qujatsyz tapansha men oq-dárini emin-erkin tasymaldaǵan kólik Taldyqorǵannyń eks-ákimi Dastan Shaltabaevtyń ulyna tıesili bolyp shyqty. Biraq kólikti sol sátte eks-ákimniń uly emes, kýrstastary tizgindegen, dep habarlaıdy QazAqparat tilshisi.
Tekserý nátıjesine sáıkes, Taldyqorǵannyń eks-ákimi Dastan Shaltabaevqa qatysty zańbuzýshylyqtar oryn almaǵan.
«Almaty oblysynyń ákimdigi Dastan Shaltabaevqa qatysty qyzmettik teskerý júrgizgen. Tekserý nátıjesinde D. Shaltabevtyń tarapynan zańbuzýshylyqtar oryn almaǵany belgili boldy. 19 naýryz kúni 055 QQQ 05 nómirli Toyota Camry avtokóligin Sharıpov esimdi azamat tizgindegen. Sharıpov - Shaltabaevtyń ulynyń kýrstasy. Qyzmettik tekserý qujattaryna sáıkes, kórsetilgen ýaqytta eks-ákimniń uly Turarbek T. D. ál-Farabı atyndaǵy ýnıversıtette sabaqta bolǵan», - dedi Memlekettik qyzmet isteri jáne sybaılas jemqorlyqqa qarsy is-qımyl agenttigi Almaty oblysy boıynsha departamentiniń ókili Symbat Israpýlova.
Symbat Israpýlovanyń aıtýynsha, kóliktiń ishinde taǵy eki jolaýshy bolǵan.
«Kólikte taǵy Beısen S. jáne Maqul N. degen azamattar bolǵan. Maqul degen azamatqa qatysty qylmystyq is qozǵaldy. Travmatıkalyq qarýdy zańsyz saqtaǵany úshin QR QK 287-babynyń 2-tarmaǵyna sáıkes Maqul N-nyń ústinen tergeý júrip jatyr. Al kólikti tizgindegen Sharıpovqa qatysty ákimshilik quqyq buzýshylyq kodeksiniń úsh baby boıynsha is qozǵalǵan. Budan bólek, mashınadan tabylǵan 055 TTD 05 jáne 007 TTD 02 vıp-nomerlerin Almaty oblysy polıtsııa departamenti ákimshilik polıtsııa basqarmasy tirkeýden alyp tastaǵan. Dastan Shaltabaevtyń 2000 jáne 2001 jyly týǵan balalarynyń jol erejesin buzyp, ákimshilik jaýapkershilikke tartylǵany jóninde málimet departamentte joq», - dedi atalǵan vedomstvanyń ókili.
Esterińizge sala keteıik, 28 naýryz kúni Almaty qalasynyń tártip saqshylary aldyńǵy terezesi qarańǵylanǵan Toyota Camry kóligin toqtatqan. Biraq ony tizgindegen azamatta júrgizýshi kýáligi bolmaǵan jáne kóliktiń ishinen travmatıkalyq tapansha men dollar valıýtalary tabylǵan. Artynsha býma-býma aqshanyń jalǵan ekeni jóninde resmı málimdeme berildi.
Al 29 naýryz kúni Taldyqorǵan qalasynyń ákimi Dastan Shaltabaevqa qatysty qyzmettik tekseris bastaldy. 12 sáýir kúni Taldyqorǵan qalasynyń ákimi aýysty. Taldyqorǵannyń ákimi bolǵan Dastan Shaltabaev Almaty oblysynyń ákimi Amandyq Batalovtyń keńesshisi bolyp taǵaıyndaldy.
