Daý-damaıdy sotsyz sheshý: Assambleıanyń medıatsııa kabınetteri qalaı jumys isteıdi
«Qazirgi ýaqytta búkil oblys ortalyqtarynda 20 medıatsııa keńesi, bir respýblıkalyq jáne 19 óńirlik kabınet bar. Assambleıa tirkeýinde 2318 medıator bar, olar 2016 jyldan bastap 134 myń ótinishti qaraǵan, onyń 51%-y medıatıvtik ymyraǵa kelý jolymen sheshildi, qalǵan 49%-yna medıator konsýltatsııa bergen», - dedi Ǵalymjan Qusmanǵalı Ortalyq kommýnıkatsııalar qyzmetinde ótken baspasóz máslıhatynda.
Sonymen birge spıker medıatsııa kabınetteriniń tıimdiligin kórsetken birneshe mysaldy keltirdi.
«Birer jyl buryn oblys ortalyqtarynyń birinde urlyq bolyp, eki jasóspirim kottedjdi tonap ketken edi. Saıajaı ıeleri quqyq qorǵaý organdaryna júgindi jáne jasóspirimder ustaldy. Polıtseıler máseleni sheshý úshin medıatsııa kabınetine júginýdi usyndy. Medıatsııa kabınetinde bul jasóspirimderdiń turmysy nashar otbasynan shyqqany belgili boldy. Onyń ústine, bir jasóspirimniń ata-anasy joq. Nátıjesinde saıajaı ıesi ótinish jazýdan bas tartyp qana qoımaı, jetim jigitti qamqorlyǵyna alyp, kolledjdegi oqý aqysyn tólep berdi», - dedi Ǵ. Qusmanǵalı.
«Qoǵamdyq kelisim» basshysy medıatorlar daýdy sotsyz rettegen taǵy bir jaǵdaı týraly aıtyp berdi.
«Taǵy bir jaǵdaı: nóser jaýyn jaýyp, kópqabatty úıdiń tóbesinen sý aǵyp, 60 páter zardap shekti. Munyń PIK pen páter ıeleri arasyndaǵy daýly jaǵdaı ekeni túsinikti. Menshik ıeleriniń biri medıatsııa kabınetine júginip, zardap shekkender men kooperatıv tóraǵalaryn shaqyrdy. Eki kúnde páter ıeleri men PIK uıymdastyrǵan medıatıvtik kelisim jasaý arqyly janjaldy sheshýge múmkindik týdy. Eger bul adamdar sotqa júginse, sot isi birneshe aıǵa sozylyp, qarjylyq shyǵyn bolar edi. Al medıatordyń qyzmeti tolyq tegin kórsetildi», - dedi Ǵ. Qusmanǵalı.
