Daý-damaıdan keıin Ulybrıtanııa úkimetinde aýqymdy kadrlyq ózgerister boldy
ASTANA. KAZINFORM — Premer-mınıstrden keıingi negizgi laýazymdardyń bárin áıelder ıelenip otyr, dep habarlaıdy Kazinform menshikti tilshisi.
Premer-mınıstr Kır Starmerdiń bastamasymen úkimet quramynda birqatar aýys-túıis bastalyp ketti.
Bul ózgerister vıtse-premer Andjela Reınerdiń daýly jaǵdaıda qyzmetinen ketýinen keıin jasaldy. Ol jyljymaıtyn múlik satyp alý kezinde zańbuzýshylyqtarǵa jol berdi dep aıyptalǵan edi.
Reınerdiń ornyna burynǵy syrtqy ister mınıstri Devıd Lemmı taǵaıyndaldy. Ol endi Ádilet mınıstrligin de qatar basqaratyn boldy. Al onyń ornyna Іshki ister mınıstri qyzmetin atqarǵan Ivett Kýper keldi.
Іshki ister mınıstrligi Shabana Mahmýdqa ótti — ol buǵan deıin ádilet salasyna jaýapty bolǵan. Turǵyn úı qurylysy portfeli Stıv Rıdke berildi — ol buryn qorshaǵan ortany qorǵaý máselelerimen aınalysqan.
Úkimet quramynan qaýymdar palatasynyń jetekshisi Lıýsı Paýell men Shotlandııa isteri jónindegi mınıstr Ien Mıýrreı de ketti. Olardyń ornyna tıisinshe Alan Kempbell men Dýglas Aleksandr taǵaıyndaldy.
Djonatan Reınolds parlamenttegi fraktsııa jetekshisi bolyp, kabınet quramyna endi. Al onyń burynǵy orny — bıznes jáne saýda mınıstrligi — Pıter Kaılǵa berildi.
Lız Kendall ǵylym, ınnovatsııalar jáne tehnologııalar mınıstri boldy. Emma Reınolds ekologııa, azyq-túlik jáne aýyldyq aýmaqtar boıynsha mınıstr qyzmetin atqarady. Pat MakFadden eńbek jáne zeınetaqy máseleleri jónindegi mınıstr bolyp taǵaıyndaldy.
Al myna mınıstrler óz qyzmetterin saqtap qaldy: Bas qazynashy Reıchel Rıvz, qorǵanys mınıstri Djon Hılı, energetıka mınıstri Ed Mılıbend, densaýlyq saqtaý mınıstri Ýes Strıtıng, bilim mınıstri Brıdjıt Fıllıpson, kólik mınıstri Heıdı Aleksandr jáne mádenıet, medıa jáne sport mınıstri Lıza Nendı.
Osylaısha, Ulybrıtanııa úkimetindegi tórt negizgi laýazymnyń — premer-mınıstr, kantsler, syrtqy ister mınıstri jáne ishki ister mınıstri — úsheýin áıelder basqaryp otyr.
Bul ózgeristerge baılanysty Bırmıngemdegi partııa konferentsııasynda sóz sóılegen ońshyl baǵyttaǵy «Ulybrıtanııany reformalaý» partııasynyń jetekshisi Naıdjel Faradj Starmer úkimetin kásipqoılyqtan ada dep aıyptap, Reınerdiń otstavkasynan keıin Leıborıstik partııanyń ydyraýy múmkin ekenin aıtty. Sondaı-aq, 2027 jyly merziminen buryn parlament saılaýy ótý yqtımaldyǵyn joqqa shyǵarmady.
Eske salsaq, buǵan deıin Reıner BAQ tarapynan kórsetilgen qysymnyń otbasy úshin aýyr tıgenin, sondyqtan ári qaraı úkimet quramynda jumysyn jalǵastyrýdyń múmkin emestigin málimdegen edi.