Dástúrli túrde ótkiziletin velojarystyń qorytyndysy shyqty - Qyzylorda
QYZYLORDA. QazAqparat - Oblystyq dene shynyqtyrý jáne sport basqarmasynyń uıymdastyrýymen áýesqoılar men mekeme qyzmetkerleri arasynda dástúrli velojarys ótti, dep habarlaıdy QazAqparat tilshisi.
8 shaqyrymǵa sozylǵan jarys darııa boıyndaǵy jańa kópirden bastalyp, Táýelsizdik dańǵyly arqyly «Syr Ana» monýmentinde máresine jetti. Nátıjesinde erler arasynda ardager sportshy Berik Kópeshov máre syzyǵyn birinshi bolyp kesse, «Qaısar» voleıbol klýbynyń qyzmetkeri Qýanysh Mustafaev ekinshi, áýesqoı sportshy Borıs Atrashkevıch úshinshi oryndardy ıelendi. Áıelder arasynda áýesqoı sportshy Ǵalııa Qýatbaeva jeńimpaz atandy.
«Eń jas qatysýshy» - nomınatsııasymen 13 jastaǵy Ádilet Álmahan, «Jasy úlken qatysýshy» - 55 jastaǵy Janabek Álnazarov, «Belsendi qatysýshy» - Meırambek Erýbaev marapattaldy.
Jarys jeńimpazdary men júldegerlerge uıymdastyrýshy mekemeniń estelik syılyqtary tabystaldy.
Aıta keteıik, eki aıdan beri ár aptanyń jeksenbi kúni ótkizilip kele jatqan aıtýly shara qarasha aıynyń sońyna deıin jalǵasyp, kelesi jyldyń kóktem aıynda qaıtadan bastaý alady.
