Dástúrli «Shabyt» halyqaralyq festıvaline qatysýshylardy tirkeý bastaldy
ASTANA. QazAqparat - 3-8 qazan kúnderi Astanada XIX «Shabyt» halyqaralyq shyǵarmashyl jastar festıvali ótedi, dep habarlaıdy QazAqparat Astana qalasynyń Mádenıet, muraǵat jáne qujattama basqarmasyna silteme jasap.
Bıyl konkýrsanttar alty nomınatsııada saıysqa túsedi. Baıqaý qorytyndysy boıynsha klassıkalyq mýzyka, halyq mýzykasy shyǵarmalaryn úzdik oryndaýshy, úzdik estradalyq vokal oryndaýshysy anyqtalady, sondaı-aq, daryndy ártister «Beıneleý óneri», «Úzdik ádebı shyǵarma» jáne «Horeografııa» nomınatsııalarynda baqtaryn synaıdy.
Konkýrsanttardy irikteý úsh kezeńmen ótedi. Qatysýshylardyń repertýary men árbir mýzykalyq aspapqa arnalǵan shyǵarmalardy uıymdastyrýshylar aldyn ala belgiledi. Árbir nomınatsııa boıynsha konkýrsty ótkizý baǵdarlamasy men ótkizý orny týraly tolyq aqparat www.shabyt.astana.kz saıtynda jarııalanǵan. Festıvalǵa qatysýǵa 16-35 jas aralyǵyndaǵy óner ıeleri ótinim bere alady. Ótinimderdi qabyldaý 20 qazanǵa deıin jalǵasady.
«Shabyt» halyqaralyq shyǵarmashyl jastar festıvali 19-shy ret ótkizilip otyr. Atalǵan shara óner álemindegi mańyzdy oqıǵa bolyp tabylady. Bul - jas daryndarǵa úlken sahnaǵa shyǵýǵa múmkindik beretin biregeı alań. Osy kúnge deıin festıvalǵa ónerdiń túrli janrlary boıynsha 10 myńnan astam adam qatysqan. Tanymal shoýmen Tursynbek Qabatov, aqyn Qalqaman Sarın, balet ártisi Áıgerim Beketaeva, opera ánshisi Aıgúl Nııazova, «Melomen» toby, Asha Mataı, Qaırat Baekenov jáne basqa da tanymal tulǵalar ár jyldary festıvalǵa qatysyp, Gran-prı ıegerleri atanǵan.
Aıta keteıik, festıvalda tek qazaqstandyqtar ǵana emes, shet memleketterdiń azamattary baǵyn synaıdy. Buǵan deıin «Shabyt» festıvalinde Avstrııa, Izraıl, Italııa, Lıtva, AQSh, Túrkııa, Frantsııa, sondaı-aq, Belarýs, Qyrǵyzstan, Polsha, Reseı jáne Ózbekstan ókilderi qatysqan.
Kórermender úshin kirý - tegin.
