Dástúrli «Mýzeı túni» aktsııasy onlaın formatta ótedi

NUR-SULTAN. QazAqparat - Dástúrli «Mýzeı túni» aktsııasy COVID-19 koronavırýs pandemııasyna baılanysty tuńǵysh ret «Biz birgemiz» ataýymen onlaın formatta uıymdastyrylmaq. Qazaqstandyq mýzeıler Halyqaralyq mýzeıler kúni merekesine oraı onlaın-aktsııany búgin ótkizbek, dep habarlaıdy QazAqparat tilshisi.

Elimizde 2006 jyldan beri júzege asyrylyp kele jatqan halyqaralyq iri áleýmettik mádenı-bilim berýge baǵyttalǵan «Mýzeı túni» jobasyn tuńǵysh ret Qazaqstannyń Ortalyq memlekettik mýzeıi uıymdastyryp, 15 jyl ishinde mýzeıge kelýshiler nazaryna XVIII - XIX ǵǵ. tıesili biryńǵaı jáne kóne jádigerlerdiń toptamasyn usynyp, 50-den astam kórme ótkizgen. Búginde atalǵan joba elimizdiń barlyq mýzeılerinde iske asyrylyp otyr.

QR Mádenıet jáne sport mınıstrliginiń málimetinshe, bıylǵy is-shara aıasynda Qazaqstan Respýblıkasynyń Ortalyq memlekettik mýzeıi «Mýzeı túni - 2020: Erekshe oqıǵalar hronıkasy (2006-2020)» atty onlaın saıahat jobasyn usynady. Sonymen qatar, bıyl «Mýzeı túni» aktsııasyna alǵash ret qosylǵan «Mádenıetterdi jaqyndastyrý ortalyǵy» memlekettik mýzeıi Uly Jibek jolyna arnalǵan «Uly Jibek jolyndaǵy mádenıet jáne din» ekspozıtsııalyq zalynyń tanystyrylymyn jasaıdy.

«Bozoq» memlekettik tarıhı-mádenı mýzeı-qoryǵy «Zaman. Ǵalym. Kózqaras» tsıkly aıasynda Qazaqstannyń belgili ǵalym-arheology, tarıh ǵylymdarynyń doktory, professor Z.S. Samashevpen suhbat júrgizedi.

Ulttyq mýzeı «Biz birgemiz» ataýymen kórermenderge «Uly Dala jaýharlary» atty beıne-ıntervıý, «Ulttyq mýzeı – ult aınasy» derekti fılmin, Qazaqstannyń respýblıkalyq mýzeıleriniń qyzmeti jóninde beınerolık, sonymen qatar birqatar zaldar boıynsha vırtýaldyq týrlar uıymdastyrady.

Á. Qasteev atyndaǵy Qazaqstan Respýblıkasynyń Memlekettik óner mýzeıi kelýshilerge tanymdyq, ınteraktıvti jáne oıyn-saýyq is-sharalar usynýdy kózdep otyr.