Dástúrli ıslamǵa qatysy joq aǵymdar tynyshtyǵymyzdy buzdy - S.Geroev

ASTANA. QazAqparat - Memleket basshysy Nursultan Nazarbaev 9 maýsym kúnin Qazaqstanda jalpyulttyq aza tutý kúni dep jarııalady. Astana qalasyndaǵy «Vaınah» sheshen-ıngýsh etnomádenı ortalyǵy qoǵamdyq birlestiginiń jetekshisi Salman Geroev aza tutý kúninde qazaqstandyqtar erlikpen qaza tapqan batyrlaryn joqtaıdy deıdi.

«Aqtóbede  bolǵan oqıǵa búkil halyqty alańdatyp otyr. Táýelsizdik alǵannan beri beıbit te tynysh ómirden basqany kórmegen qazaqstandyqtar báz-bireýlerdiń kelip, neshe jylǵy qazynamyz - beıbitshiligimizdi buzǵanyn qabyldaı almaıdy. Dástúrli ıslamǵa úsh qaınasa da sorpasy qosylmaıtyn dinı aǵymnyń ókilderi bizdiń tynyshtyǵymyzdy buzdy. Sondyqtan,  naǵyz musylmannyń eshbiri de mundaı jaǵdaıdy qabyldaı almaıdy. Asyl dinimiz ıslam adamǵa zorlyq-zombylyq kórsetýge tyıym salǵan. Tipti, búkil tirshilik ıesine qııanat jasaýǵa ruqsat joq. Al, beıbit halyqty óltirý - ıslamdaǵy aýyr jazalardyń biri. Alla Taǵala bergen jandy Alla ǵana alady», - deıdi aýyr kúrsingen S.Geroev.

Onyń aıtýynsha, etnomádenı uıymdar burynǵydaı bir shańyraqtyń astynda birlik pen yntymaǵyn saqtaı bermek.  Jáne S.Geroev Jalpyulttyq aza tutý kúninde qazaqstandyqtar erlikpen qaza tapqan batyrlaryn joqtaıdy, dedi.

«Qaza tapqandardyń jaqyndaryna biz de qaıǵyryp kóńil aıtamyz. Jalpyulttyq aza tutý kúninde búkil qazaqstandyqtar erlikpen qaza tapqan batyrlarymyzdy joqtap, jaqyndaryna kóńil aıtady», - dedi S.Geroev.