Dástúrli ánshi Tatıana Býrmıstrova 60 jasta

ShYMKENT. QazAqparat - Bıyl Qazaqstan Respýblıkasynyń eńbek sińirgen qaıratkeri, dástúrli ánshi Tatıana Býrmıstrova 60 jasqa tolyp otyr, dep habarlaıdy óńir basshysynyń baspasóz qyzmeti.

Búgin osy merekeli dataǵa oraı Ońtústik Qazaqstan oblysynyń ákimi Janseıit Túımebaev ánshimen arnaıy kezdesip, mereıli mereıtoıymen quttyqtady. 

Dástúrli ánshi ónerge sarp etken 31 jylynda qazaq halqynyń tól týyndylary men termelerin naqyshyna keltire oryndap qana qoımaı, el arasynda joǵary deńgeıde nasıhattap keledi. 

«Men sizdiń qazaq ánine, qazaqtyń ónerine degen qurmetińizge tánti bolamyn. Siz shyǵarmashylyq ǵumyryńyzdy halyq qazynasyn dáripteýge arnaǵan jansyz. Sizdiń bul qadamyńyz kóp ultty táýelsiz elimiz úshin óshpes ónege, úlgi bolarlyq dúnıe», - dedi Janseıit Qanseıituly.

Qazaqtyń án-termesin 30 jyldan asa ýaqyttan beri dəriptep eliniń súıispenshiligine bólenip júrgen orys qyzy Tatıana Býrmıstrova Bəıdibek aýdanyndaǵy Alǵabas aýylynda dúnıege kelgen.

Orys otbasynda týyp-ósken oǵan qalyń qazaqtyń ishinde júrip, tildi meńgerý qıynǵa soqpaǵan, sol sııaqty mýzykaǵa degen qyzyǵýshylyq   onyń 7 jasynan dombyra úırenýge degen yqylasyn oıatqan. Almatydaǵy medıtsına ınstıtýtynda oqyp júrgende respýblıkalyq «Altybaqan», «Tamasha» sııaqty telehabarlarǵa túsip, ánshi retinde elge keńinen tanyla bastady.

 Óz kezeginde sóz alǵan Tatıana Býrmıstrova shyǵarmashylyǵyna erekshe baǵa bergen óńir basshysyna alǵysyn jaýdyryp, aldaǵy josparlarymen bólisti.

«Búgin oblystyq orys drama teatrynda «Áıeldiń jasy 18...» atty shyǵarmashylyq keshimdi bergeli otyrmyn. Meniń bul qadamymdy týyp, ósken jerime, týǵan topyraǵyma, kıeli Ońtústigime esep berý dep qabyldaǵan jón. Elbasymyzdyń «Bolashaqqa baǵdar: rýhanı jańǵyrý» maqalasynda aıtylǵan qazaq halqynyń kody meniń oıymsha osy qazaqy dástúrinde, qazaqy ánderinde dep túsinemin», - dedi dástúrli ánshi.

Búgin oblystyq orys drama teatrynda dástúrli ánshiniń «Áıeldiń jasy 18...» atty shyǵarmashylyq keshi keshi ótedi. Teatr foıesinde «Qııaǵa qanat qaqty qansha armanym!»  atty ánshi ómirinen fotokórme uıymdastyrylsa, «Qońyr daýys» derekti fılmi kórsetilip, onda ánshi ómiri men óner jolyndaǵy qyzyqty da tartysty kezeńder beınelenedi.

Shyǵarmashylyq kesh «Men qazaqtyń qyzymyn», «Aq tamaq» ánderi jáne teatrlandyrylǵan qoıylymdarmen bastaý alyp, T. Býrmıstrova ónerine arnalǵan óleńderden poetıkalyq kompozıtsııa, halyq ánderinen sazdy án shashýlar men «Áıeldiń jasy 18» syrlasý ánder oryndalady.