Dástúrli aqparat quraldarymen qatar, áleýmettik jelige basa mán berý qajet - Prezıdent

ULYTAÝ. QazAqparat – Ulttyq quryltaı eleýli azamattyq qoǵam ınstıtýttarynyń birine aınalýy tıis. Bul týraly Ulytaý oblysynda ótip jatqan Ulttyq quryltaıdyń otyrysynda QR Prezıdenti Qasym-Jomart Toqaev aıtty, dep habarlaıdy QazAqparat tilshisi.

«Qazir – ınternet dáýiri. Jastar ózine qajet málimetti ǵalamtordan alady. Dástúrli aqparat quraldarymen qatar, áleýmettik jelige basa mán berý qajet. Jańǵyrýdyń mańyzyn urpaq sanasyna sińirý úshin jańa tásilderdi qoldaný kerek», - dedi Qasym-Jomart Toqaev.

Osy oraıda Prezıdent túsindirý jumysy kezinde jastarǵa aıryqsha nazar aýdarý kerek ekenin qadap aıtty.

«Óıtkeni, búgingi reformalardyń ıgiligin erteń solar kóredi. Biz ne istesek te, bárin urpaq úshin istep jatyrmyz. Árıne, qoǵamnyń basqa ókilderi de tys qalmaýy tıis. Jańa qoǵam quryp, jańa sanany qalyptastyrý isine búkil eldi uıystyrý qajet. Osylaısha, quryltaı reformalardy júzege asyrýǵa jan-jaqty atsalysady. Túptep kelgende, Ulttyq quryltaı negizgi azamattyq qoǵam ınstıtýttarynyń birine aınalýy tıis», - dedi Memleket basshysy.