Dástúrli aktsııa aıasynda OQO-dan 9 myń tonna jemis-jıdek elimizdegi dúkenderge jetkizildi
ASTANA. QazAqparat - QR IDM Kólik komıtetiniń «Jasyl ónimge - jasyl jol» aktsııasy aıasynda Ońtústik Qazaqstan oblysynan 26 avtokerýen (603 avtokólik jumyldyryldy) jolǵa shyqty. Qazaqstandaǵy kólik joldary arqyly dúken sórelerine qosymsha tekserýsiz 9 myń 257 tonna jemis-jıdek jetkizildi.
Bul týraly QR IDM baspasóz qyzmeti habarlady.
Esterińizge sala keteıik, alǵashqy avtokerýen QR IDM Kólik komıteti, OQO oblys ákimdigi, Saryaǵash, Shardara, Maqtaral aýdany ákimdigi ókilderiniń qatysýymen Saryaǵash qalasynan 2015 jyldyń 2 shildesinde jolǵa attanǵan bolatyn. QR IDM mamandarynyń aıtýynsha, aktsııanyń maqsaty sapaly jemis-jıdekterdi saýda oryndaryna avtokólik joldary arqyly esh kedergisiz, qosymsha tekserýsiz jedel jetkizýdi qamtamasyz etý. Aktsııa jyl saıyn dástúrli túrde ótkizilip turady.
