Dástúrli sport túrleri - básekelestikti jáne minezdiń myqtylyǵyn saqtaıtyn mura – mınıstr
ASTANA. KAZINFORM – Mınıstr Erbol Myrzabosynov Sankt-Peterbýrgte ótken Etnosport forýmyna qatysty. Bul týraly Týrızm jáne sport mınıstrliginiń baspasóz qyzmeti habarlady.
Týrızm jáne sport mınıstri Erbol Myrzabosynov Reseıdiń Sankt-Peterbýrg qalasynda ótken «Dástúrli sport túrlerin qaıta jańǵyrtý» atty VII Etnosport forýmyna qatysty.
Dástúrli túrde ótetin bul forýmǵa Dúnıejúzilik etnosport konfederatsııasynyń prezıdenti Bilál Erdoǵan, sondaı-aq 75 elden delegattar men sarapshylar qatysty.
Forým aıasynda dástúrli sport túrleriniń bolashaǵyna arnalǵan taqyryptyq sessııalar, saraptamalyq pikirtalastar jáne strategııalyq kezdesýler ótti. Qatysýshylar etnosportty damytýdyń qysqa, orta jáne uzaq merzimdi strategııalaryn, sondaı-aq saladaǵy turaqtylyq pen ınstıtýtsıonaldyq ósý máselelerin talqylady.
Sondaı-aq forýmda byltyr Astanada ótken V Dúnıejúzilik kóshpendiler oıyndary mysalǵa alyndy. 89 elden kelgen 3000-ǵa jýyq sportshy qatysqan bul halyqaralyq is-shara ulttyq sport túrlerine degen qyzyǵýshylyqty arttyrǵan. Nátıjesinde elimizde asyq atý, toǵyzqumalaq, jamby atý, kókpar jáne basqa da sport túrleri boıynsha úıirmeler men sektsııalar sany kóbeıdi.
Óz sózinde Bilál Erdoǵan Qazaqstannyń dástúrli sport túrlerin júıeli túrde damytyp kele jatqan jetekshi elderdiń biri ekenin atap ótti. Onyń aıtýynsha, elde ulttyq oıyndarǵa degen qyzyǵýshylyq jyl saıyn artyp keledi, al memleket tarapynan kórsetilip otyrǵan qoldaý men bastamalar búkil etnosport qaýymdastyǵy úshin mańyzdy tájirıbege aınalǵan. Sonymen qatar, ol Qazaqstannyń ulttyq sportty jańǵyrtý men halyqaralyq deńgeıde ilgeriletý baǵytyndaǵy naqty sharalary ózge memleketter úshin úlgi bola alatynyn jetkizdi.
Taqyryptyq sessııada sóz sóılegen Erbol Myrzabosynov Qazaqstan úshin ulttyq sporttyń mańyzyna erekshe toqtaldy.
— Qazaqstan úshin ulttyq sport túrleri tek tarıhı mura ǵana emes, ótken men bolashaqty, mádenıet pen sportty, dástúr men zamanaýı qundylyqtardy baılanystyratyn tiri ári damýshy organızm. Ulttyq oıyndar arqyly biz jas urpaqty tárbıelep, patrıotızmdi qalyptastyramyz, ári álemmen ózara dıalog júrgizemiz. Dástúrli sport túrleri halyqtyń fılosofııasyn, jerge degen qurmetin, adal básekelestikti jáne minezdiń myqtylyǵyn saqtaýshy mura, — dedi mınıstr.
Aıta ketelik Ulttyq sport túrleri qalaı qalyptasqany týraly jazǵan edik.